David Luiz a chawlh a ngaiDavid Luiz a chawlh a ngai

Arsenal defender rinrawl David Luiz chu a malpui vei lam hliam vangin a chawlh rih a ngai a, nizana Dundalk nen Europa League group match an khelhah pawh a inlan thei lo.

Kar hmasa khan Gunners hi Premier League lama an mikhual Leicester City lakah 1-0 in an tlawm a, Foxes an hneh loh ṭum hian Luiz hi a inhliam. Tun kar tawpah Manchester United an hmachhawn hunah a inlan thei dawn em tih a la chiang lo a ni.

Arsenal hian tlarhnung laiah player an ngah, mahse chhawr tlak erawh Gabriel leh Shkodran Mustafi chauh an nei. Rob Holding, Calum Chambers leh Pablo Marí te hliam vangin an chawl mek a, rawlthar William Saliba leh Sokratis Papastathopoulos te erawh manager Mikel Arteta-a'n chhawr tlakah a ngai rih lo.

EPL season kal laiah Gunners hian match ruk aṭangin goal sarih chauh an la chhuah a, goal chhuah tlem ber an ni. Mahse goal riat chauh an la khung thung a, point kua hmuin table-ah 11-na dinhmun an luah phak hram.