Dortmund chakna Sancho leh Haaland

Hun tawp dawn lama Jadon Sancho leh Erling Haaland te goal hmangin Borussia Dortmund chuan an mikhual Zenit St Petersburg chu 2-0 in an hneh a, Bundesliga club ṭha hian tun season Champions League bika hnehna an chan vawi khatna a ni.

Nilaini zan group F inkhel dangah Lazio chu Club Brugge nen 1-1 in an inhnehtawk thung a, club pali zingah kal fal thei an awm loh avangin point la hmu lo Zenit tan pawh knockout round luh beiseina a la awm.

Signal Iduna Park-a inkhelah Dortmund lamin ball chang tam mah se goal an khung mai thei lo, goal hmasa zawk nei tur pawhin minute 78 an nghah thlen a ngai a, penalty aṭanga khung a ni bawk.

Thorgan Hazard-a penalty hlawh chhuah pet turin Sancho a rawn ding chhuak a, English rawlthar hian tun season bul a ṭan fuh loh thai bo nan a hmang a, chiang takin a khung. Hun tawp hma chiahin Haaland chuan an goal hnihna a khung leh bawk.

Zenit tlanghnungah hian Dejan Lovren a awm, Liverpool defender hlui hi a khel ṭha hle. German club lam goal nawr hlauhawm tur tam tak dang chattu a ni. Virgil van Dijk leh Joel Matip chhawr thei lo Reds lamin an ngai khawp ang.

Nipui bazar laiin Manchester United nen nasa taka sawi zawm a ni a, mahse Sancho chu a khelhna ngai Dortmund tan a khel chhunzawm. English forward hian beisei angin season bul a ṭan fuh lo.

Dortmund manager Lucien Favre chuan a player duhlaiin season a hman ṭhat loh chhan hi transfer boruak nghawng kha nia a hriat thu a sawi hial a, Zenit laka a khelh danah erawh a thiam a la theihnghilh lo tih a chiang.

Kum 20 mi Haaland sawi hmaih theih a ni lo, 6 ft 4 in a sang striker hian European football match 15 a khelh aṭangin goal 15 a khung der tawh! Chhinchhiah rawh u, hliam nei loa a khel tluang a nih chuan club lian dangin an chuhpui thuai ang.

Hnehna chang mah se Dortmund tan inenfiahna tur a tam, striker Haaland chuan, "Ball chang tam ringawt mah ila goal khung kan harsat hle, inkhel hautak tak a ni. Hetiang hunah hian dawhtheih a ngaihzia a lang ṭhin," a ti.

Dortmund hian 2012 hnu lama a vawi khat nan an khelmualah Champions League match li chhung chu a zawnin hnehna an chang ta a, chhawmnun zel an tum ang. An mualah hian November 25-ah Club Brugge an mikhual leh ang.

Favre naute hian Inrinni zan dar 8:00 hian Bundesliga khel turin Armina an lenchilh zui dawn, Bundesliga lamah pathumna an ni mek - an chunga awm Bayern Munich nen point 12 ve ve an hmu.

Kar hmasa lawk khan Lazio-in Dortmund 3-1 in an hneh a, club nem zawka ngaih Club Brugge hi harsa vak loa hneh thei tura ngaih ni mah se an chak zo lo, 1-1 in an inhnehtawkpui.

Italian club hian minute 14-na lekah Joaquin Correa hmangin hma an hruai a, khung belh theihna hun an hlah hnuah Belgian club lamin Hans Vanaken-a penalty hmangin an sut a, goal dang a luh belh tawh lo.

Lazio manager Simone Inzaghi chuan, "Ka naute khan an theihna zawng zawng an hlan," a ti. Serie A club hian hliam leh Covid-19 vangin player 12 ngawt an chhawr thei lo a, an tan khualmuala point khat hlawhchhuah hi a ṭha.