Man United an nui leh thei ta

Manchester United chuan Nilaini zan Champions League-ah Bundesliga hmahruai mektu RB Leipzig 5-0 in an sawp a, match hnih khelhah vawi hnih an chak avangin knockout stage lut turin an dinhmun a ṭha hle.

Old Trafford-a inkhelah hian Man United tan substitute Marcus Rashford-a'n hattrick a siam a, Mason Greenwood leh Anthony Martial ten goal khat ve ve an khung bawk.

Ole Gunnar Solskjaer hote hi October thla tirah Tottenham Hotspur lakah 6-1 in an mualpho a, an hmabak a thim viauah a ngaih theih. Amaherawhchu hemi hnu hian Man United an insiam ṭha a, Newcastle leh PSG an hneh bakah Chelsea leh RB Leipzig lakah goal an chhuah lo.

United-in nipui transfer-ah Donny Van de Beek an lalut a, Dutch midfielder hian bench-ah hun tam zawk a hman avangin football expert-ten English club hi ṭul loa sum sengah an ngai.

Ole chuan Leipzig an hmachhawn hmain amah pawh a inkhelh hun laia bench-a a awm fo thu leh player pawimawh a nih ṭhin tho thu a sawi a, Van de Beek pawhin hmun pawimawh a chan tur thu a sawi.

Leipzig nen hian Van de Beek-a'n bul a ṭan a, Premier League lama bench-a ṭhu Paul Pogba, Nemaja Matic leh Mason Greenwood ten bul an ṭan bawk. Player thar Alex Telles erawh Covid-19 positive vangin squad-ah a awm thei lo. Hming langsar Edinson Cavani, Marcus Rashford leh Bruno Fernandes te bench-ah dah an ni.

Ole-a'n duh thlan tur player a kawl tam avangin a duh thlan danah inkhelh hmain sawisel a hlawh ṭhin. PSG nen pawh sawisel a hlawh a, Leipzig nen pawh an fak chuang lo. Amaherawhchu UCL match hnih an khelh zawhah Norwegian manager hian fak a hlawh hle.

Man United-in bul an ṭan ṭha zawk a, Pogba ball pass fing zet chu minute 21-naah Greenwood-a'n goal-ah a chantir. English rawlthar vengtu Leipzig defender hi tun hnaia defender hming langsar Dayot Upamecano a ni a, hei hian Greenwood-a goal hlutna a belhchhah - VAR hman a ni chungin Greenwood kha a pawng hret em?

United-in first half-ah Upamecano hoa Leipzig tlarhnung inrem phui ṭha tak lakah goal khat bak khung belh thei lo mah se hmahruaitu nih erawh an phu thung. 

Solskjaer-a'n chak duhin Fernandes leh Rashford te a luhtir a, player ṭha pahnih hian danglamna an thlen.

Minute 74-naah Fernandes-a ball pek chu Rashford-a'n um lutin keeper chiah a hmachhawn hnuah harsatna nei loin a khung. Minute 78-naah Rashford-a'n Leipzig defender bumin ṭha takin a pet goal leh a, United an chak dawn tih a chiang ta.

Minute 87-naah Martial-a'n penalty a hlawh chhuak a, Rashford tan hattrick siam theihna ni mah se season bul ṭan ṭha lo French forward tan a kian. Martial-a'n United goal lina penalty aṭangin a khung.

French forward hian amah duhsaktu Rashford hnenah ball ṭha pe ve lehin English striker hian injury time-ah goal a khung a, hattrick a siam. United player zingah bench aṭanga lut hattrick siam pahnih chiah an la awm a, Rashford hmaa ti thei awm chhun chu tuna manager Solskjaer hi a ni.

Man United-in team ṭha an ni tih an pholang a, goalkeeper David de Gea-a'n hna ngah lo mah se mamawh hunah a thawh tur a ti ṭha. Harry Maguire-a'n khawvel defender manto ber a nih chhan a lantir thei a, bench aṭanga rawn lut Axel Tuanzebe pawh mual sir lamah awm mah se a rintlak viau. 

Midfield-ah Fred-a'n harhtharna a chang chhunzawm zel a, tun anga a khelh reng theih chuan Brazil squad-ah pawh a tel chho leh thei ang. Van de Beek-a'n no. 10 role a khel turin Fernandes angin ball fing pe thei lo mah se squad tihchakna ṭha tak a ni tih a rawn pholang.

Uruguayan striker Edinson Cavani goal hmaah a la vanduai a, chutih rualin a khelh dan thlirin goal a hnai viau ang. Rawlthar Greenwood-a'n khelmual pawnah nun hloh zeuh mah se Solskjaer-a'n a chhan tlat a, tunah chuan goal hmangin a pu lawmna a rawn siam ta thung.

Solskjaer-a'n inkhelh banah an khelh dana a lungawi thu a sawi a, Manchester United hian Pathianni zan dar 10:00 hian Old Trafford-ah Arsenal an mikhual ang - an dinhmun dik tak fiah a ni chho zel dawn.