Delph-a'n Villa fan bumin City a zawm

Aston Villa captain Fabian Delph chuan Villa Park a chhuah­san loh tur thu a sawi aṭanga kar khat pawh a ral hmain Manchester City-in pound maktaduai 8-in an lei chhuak.

Kum 25-a upa English mid­fielder hian January thla khan kum li leh a chanve chhung atan Villa-ah contract a ziah belh a, a contract ziah thara 'release clause' chu pound maktaduai 8 a ni. Release clause thar anga ngamtu club an awm a, player-in chhuah a duh bawk chuan club tan dan theih a ni lo. Villa hian an captain hi chhuah a duh tlat avangin man to zawkin an hralh thei lo a, an dang thei lo bawk.

Real Madrid star Cristiano Ronaldo hi a contract neih laia a release clause chu pound maktaduai 790 (€1 billion) daih a ni a, club phalna lo chuan a chhuak thei lo a ni ber. England tana vawi ruk khel tawh Delph erawh hmingchhiat hreh loh chuan Villa chhuahsana club ṭha zawk zawm hi a harsa lo.

Delph hian Zirtawpni khan medical test a patlang a, a team­mate te zawm turin Australia a pan nghal, villa phatsantu Delph hian Frank Lampard jersey no. 18 a ha ang.

Villa chuan, "Aston Villa chuan Fabian Delph-a'n a con­tract-a release clause awm chu hmang ṭangkaiin Manchester City a zawm tih hi thudik tih kan nem­nghet e. A kal zelna turah duhsakna kan hlan," tiin thuchhuah an siam.

Zirtawpni khan Delph-a'n medical test a patlang zawhah City zawm turin City goalkeeper Joe Hart bakah City aṭanga Villa lak luh Micah Richards te thurawn a lak thu a sawi.

Manchester City manager Manuel Pellegrini chuan, "Kum 25 chauh a ni a, a ṭhat lai ber a la tawng lo. Player ṭha bik a ni a, anni nena thawhduh hi ka châk tawh hle a ni," tiin a sawi.

Delph hian January-a contract a pawhsei khan, "Player rinawm ka ni a, club tana ka inpekna chu ka contract ziah thar hian a nemnghet a ni. Club hi a ka hmangaih a, helai hmuna awm hi nuam ka ti a, hei hi ka club a ni," tiin a sawi a, thla ruk a ral meuh chuan a thusawi a theihngilh tawh.

Transfer boruak a inṭan khan January thlaa Delph-a thusawi hi sawi zui a ni tawh lo a, City a zawm tur veka ngaih a ni. Amaherawhchu amah berin Villa tana a cham tur thu a sawi a, Villa fan-te lawm hlawh hman viau mah se a thusawiah a din nghet loh avangin Villa fan-te hmelma a ni.