Chak mah se PSG lawm a kim lo

Paris St-Germain chuan Moise Kean a goal hnih hmangin Istanbul Basaksehir 2-0 in an luh chhuah a, hnehna chang mah se Ligue 1 champion hian an thiampuipa Neymar chu hliam vamngin an chan a, an lawm a kim thei rih lo.

Champions League finalist PSG-in kuminah bul an ṭan fuh lo, an match hmasa zawkah Manchester United an hneh lo, match pahnihnaah erawh che sual nawn loin an mamawh point thum an hmu.

Paris St-Germain hian Ligue 1 leh UCL lamah season hmasa lama an khelh dan an la phak lo tih chu thil chiang a ni a, tun ṭumah pawh hian a tir lamah an tlarhma an hriam loh bakah tlarhnung a phui tawk lo.

Defender tihsual vangin Edin Visca chuan hun ṭha nei mah se goalkeeper Keylor Navas a paltlang zo lo a, Real Madrid keeper hlui bawk hian Deniz Turuc khung ngei tur a dansak bawk.

Minute 64-naah Kean a rawn inlar, Everton aṭanga loan hmanga an hawh striker hian goal hmahruai a tauh lut a, minute 79-naah an goal hnihna a khung bawk - PSG goal pahnih hi forward Kylian Mbappe siamsak ve ve a ni thung.

Pound maktaduai 200 man Neymar hi PSG tan goal thun khawl a ni satliah lo a, inkhel cheimawitu a ni tel. Minute 26-na lekah tihrawl na vanga lak chhuah a ngai, a chawlh chen tur hriat a la ni lo.

PSG coach Thomas Tuchel chuan, "Hliam na tak a nih loh hram ka beisei, mahse inkhel chhunzawm tur kha chuan a dinhmun a ṭha tawk lo chu a ni. Endikna neih a nih phawt loh chuan a dinhmun tak sawi theih a ni rih lo," tiin a sawi.

French champion hian Neymar awm lo mah se an mamawh goal erawh an khung tho, European football-ah hian match an khelh hnuhnung 37 zinga 36-ah chuan goal an khung - season hmasa final chauh kha an khung lohna awmchhun a ni hial.