Hmeichhe champion Electric Veng VC
Inelna tawp ni match hmasa berah Electric Veng-in set hloh loin Mizoram Homeguard an hneh nghal a, point sarih hmuin hmahruaitu an la ni chauh. Champion thei dinhmuna ding Power Department-in champion turin Mizoram Police an hneh ngei a ngai a, point an hlawhchhuah tak loah chuan Electric Veng an champion a, pahnihnaah Mizoram Police an awm. Vawi hnih inkhelh kuala hmahruaitu Power Dept chu pathumna niin palinaah point hmu lo Mizoram Homeguard an awm.
Electric Veng champion-na kawngah captain Rody Lalzuiliani'n team a kaihruai ṭha a, star player Lalbiakdiki chu player ṭangkai ber a ni.
Hmeichhe champion team hian Rs 13,000 leh trophy an dawnga; Pahnihnain Rs. 9,000 leh trophy an dawng bawk. Pathumnain Rs 5,000 an dawng a, palinain Rs. 3,000 an dawng bawk.
Volleyball Dan
Thlirna Tawi
1. Set thum la hmasa an chak.
2. Set (5th set tiam loin) la turin point 25 hmuh a ngai a, khingpuite aiin point hnih talin an hmu tam tur a ni (Eg: 25-23). Chutihrualin 24-24 a nih chuan khelh chhunzawm tur a ni a, set la turin team pakhat zawk chu point hnih talin a san zawk a ngai (Eg : 26-24; 27-25;...).
3. Set hnih ve ve an lak chuan deciding 5th set khelh a ngai a, set la turin point 15 hmuh a tawk a, set dang angin point hnih thoin san a ngai (Eg : 15-13).
4. Point Hmuh Dan : Team chak zawk chuan 3–0 emaw 3–1 emaw a hnehna an chan chuan point 3 an hmu a, a chaklo teamin point an hmu lo. Deciding set an khelha zawha 3–2 a chak zawk teamin 2 points an hmu a, a chak lo teamin 1 point an hmu thung.