Man United an chak nghal
Manchester United chuan Inrinni khan season thar atana inpuahchahna match hmasa berah minute ngana leka player thar Morgan Schneiderlin tauh luh hmangin Club America 1-0 in an hneh. Inelna hi International Champions Cup tih a ni.
CenturyLink Field, Seattle-ah United player thar Schneiderlin, Memphis Depay, Matteo Darmian leh Bastian Schweinsteiger te an inlan vek. United tan player 22 an inlan a, Real Madrid nena sawi zawm keeper David de Gea leh Antonio Valencia chu inhliam vangin an khel ve lo.
Van Gaal a lawm lo
Mexican club lakah United an khel ṭha tawk lo a, United manager Louis van Gaal chuan an khelh chhiat chhanah field chhia chu mawhpuh. Dutch manager chuan, "Field kha a ṭha lo a, khelh a harsa a ni. Artificial turf chin kha kan hmuh chu a ni a, phul tak chin kha chu a chhe zo a ni. Field ṭha loa inkhelh chu inhliam a hlauawm a ni. England-ah chuan Old Trafford a awm a, football tan chauh a ni. One Direction tan hmun a awm lo. Amaherawhchu England-ah chuan football chauh an tuipui a, America-ah chuan football, baseball leh basketball te an tuipui a, an kalphung a dang daih a ni," tiin a sawi.
Kar hmasa Nilaini khan CenturyLink Field-ah band lar One Direction-in concert an nei a, field-in ngai a awh hman loh avangin grass ṭhenkhat chu a lang nalh theih nan rawng hringin an kap hial.
Manchester United hian Nilaini zing dar 8:30-ah MLS club San Jose Earthquakes an hmachhawn anga, Star Sports 4-ah live-a pekchhuah a ni ang.
Tu nge United tan khel?
Man United first-half: Johnstone, Darmian, Jones, Blind, Shaw, Carrick, Schneiderlin, Young, Mata, Memphis, Rooney (c).
Second-half: Lindegaard, McNair, Smalling (c), Evans, Blackett, Lingard, Schweinsteiger, Herrera, Pereira, Januzaj, Wilson.