Bianchi a thi; Formula 1-in an sun

French Formula 1 driver Jules Bianchi chu Inrinni zing khan France ram chhim lama Nice damdawi inah a boral. Nikum October thlaa tlan Japanese Grand Prix-ah khan Bianchi hi chesualin a lu na takin a sawh a, a thih ni thleng hian a harhchhuak pangngai tawh lo. Thla kua zet nikhaw hreloin a awm a ni.

Nikum khan khawchhe tak hnuaia Suzuka tlan kawngah Japanese Grand Prix tlan a ni a, lap 43-naah Williams driver Adrian Sutil chesualin a car hnuk sawn tur hian recovery vehicle an rawn lut. A hnunga rawn tlan Marussia driver Bianchi chuan kawng nal avanga a car thunun zo loin recovery vehicle hi na takin a su. Bianchi hian a luah hliam na tak a tuar a, rang takin Mie General Hospital-ah hruai nghal a ni.

A hliam a nat em avang leh a harhchhuah theih mai loh avang hian a nu leh pa te chenna Nice, France-ah hruai a ni a; kum 25-a upa Bianchi hi dam leh ngei tura theihtawpa an enkawl laiin a boral ta a ni.

Thuchhuah siamin Bianchi chhungte chuan, "A natna hneh turin nitin a bei ṭhin; mahse tunah chuan natna awm tawh lohna hmunah min chawlhsan ta," tiin an fapa boral thu an sawi.

An driver an ui thu sawiin Marussia chuan, "Jules vanga kan lungngaihna hi thua sawi chhuah phak rual a ni lo. Kan hnena a awm chhunga thil tih zawng zawngte kha kan theinghilh ngai dawn lo a; kumkhuain kan hre reng tawh ang," tiin an driver vanduai chu an lainat hle.

Formula 1 thuneitu sang Federation Internationale de l'Automobile-in a chhui chian danin Bianchi kha intlansiak tlan kawng aṭanga a tlan chhuah dawn khan torque leh brake a rah kawp avangin a car kha a tlenga, a thunun zui thei lo a ni.

Ferrari young driver aca­demy aṭanga inzir chhuak For­mula 1 driver beiseiawm ber pawl Bianchi hian kum 2013 Australian Grand Prix-ah khan a professional bul ṭanin vawi 34 intlansiak a hmachhawn hman. A chet ṭhat ber ṭuminnikum khan Monaco Grand Prix-ah pakuana a ni nghe nghe.

A driver pui ten an ui

Twitter-ah McLaren driver Jenson Button chuan, "Mipa dik tak leh mihuaisen kan chan ta, a chhungte ka tawrhpui tak zet. Thlamuang takin chawl ang che Jules," tiin a ziak.

Formula 1 champion lai leh tun season-a hmahruai mek tu Lewis Hamilton chuan, "Chan­chin lungchhiatthlak tak ava ni tehlul em...Jules Pathianin awm­pui mawlh che rawh se," a ti.

Manor Marussia driver Roberto Merhi chuan, "Motor intlansiak ngaina tu te tan chuan a lungchhiatthlak takzet. Thla kua zet huaisen taka a beih hnuah min chawlh san ta. Ka ṭhian thlamuang takin chawl nang che," tiin a ṭhianpa a thlah.

Red Bull team chuan, "Channa nasa tak a ni chiang ngei mai. A chhungte leh a ṭhiante kan tawrhpui tak zet.. #RIPJules #JB17," tiin thuchhuah an siam.