Beckham-a'n MLS club a nei hnai

England captain hlui David Beckham leh a thawhpuite'n MLS-a club thar neih an tumna kawngah hmasawnna an hmu a, an club thar stadium tur sak tumin hma an la mek.

Beckham-a te club tur hi Miami khawpui behchhana din tur a ni dawn a, an stadium thar sak tur pawh hi Miami Marlins baseball park bulah sak tur a ni.

Kum 2007-2012 chhunga MLS club LA Galaxy tana lo khel tawh Beckham hian February, 2014 khan Miami khawpui behchhanin MLS club thar an din tur thu a lo sawi tawh a, mahse 2014-ah vek hian mi 25,000 lenna tur stadium sak an tumna chu hnawlsak an lo ni tawh. Mahse, khawvela footballer lar ber ang hiala an chhal ṭhin Beckham a beidawng duh lo a, Manchester United player hlui hian 2014 vek khan, "Dan khawtlai kan nih avangin hrehawm ti hle mah ila kawng dik lam zawhin kan kal zel a, kan hmalak tumnate hi kan hlen ngei dawn a ni," tiin a lo sawi tawh.

Beckham-a thawhpui zinga mi Sprint chief executive Marcelo Claure chuan stadium sak an tum dan leh an ruahmannate chu Miami mayor Tomas Regalado hnena an thlen tawh thu a sawi a ni.