Barcelona president-ah Bartomeu a tling nawn
Inrinni khan Spanish club lian Barcelona chuan president thar thlanna an nei a, president ṭanglai Josep Maria Bartomeu chuan president hlui Joan Laporta hnehin kum ruk chhung Barcelona president a ni leh dawn ta.
Kum 52-a upa Bartomeu hian club member vote tlaa 54.63% hmuin hnehna a chang a, kum 2003-2010 chhunga Catalan club president hna lo chelh tawhtu Laporta-a'n a khan lo hle.
January, 2014 khan president ṭanglai Sandro Rosell chuan Neymar an lakluh dan chungchangah buaina a tawh avangin Bartomeu hian Barca president hna a chelh ṭan a, a vawi hnih nan thlan nawn a ni leh ta a ni.
Season hman zawh taka Barcelona-in Champions League, La Liga leh Copa Del Rey nomawi an chawi avangin Bartomeu hi a hmingṭha hle a, Laporta-a'n nasa takin bei mah se Barca chhungkaw rilru-ah Bartomeu hi a la tla na hle.
Kum 18 hnuailam player an lakluh dan dik lo avangin Barca hi an mualpho hle a, nakkum January thla thleng chu player la lut thei lo tura hrem an ni. Barca hremna tawrh mek hi tam tak chuan Bartomeu-a thiam lohah puhin president a nihna aṭanga paihthlak an duh a, Laporta pawhin hei hi a khingpuipa beih nan hian a hmang.
Mahse Barca-in player ṭha an hip reng tho a, tun hnaiah nakkum January thla aṭanga chhawr ṭan theih turin Sevilla defender Vidal leh Premier League club lian ten an hel lai Atletico midfielder Arda Turan an la lut. Bartomeu beih nana an hman buaina hi player ṭha te'n an ngaimawh lo niin a lang a, season ṭan tir a khel thei lo tur chung chung pawhin Nou Camp an pan zel tho a ni.