Burnley-in neitu thar an nei hnai

Premier League club Burnley-in neitu thar an nei hnai a, Egyptian sumdawng hausa Mohamed El Kashashy leh dan hremi Chris Farnell-te chuan Clarets (Burnley sawina) hi pound maktaduai 200-in lei an inhuam. 

Farnell hi dan hremi lar tak niin Staunch Partners Limited company neitu a ni a, infiamna khawvelah chuan Tyson Fury, Cristiano Ronaldo, David Silva leh Roberto Martinez-te chu a lo thawhpui tawh mi lar te an ni. 

Wigan Athletic-a director hna pawh lo chelh tawh Farnell hian kumin kumtir lam khan Charlton Athletic lei tumin hma a lo la tawh a, mahse a hma lak danah dik tawk lo a awm avangin Football League chuan English club nei thei lo turin hremna a pe hial. 

Mahse, dan lama mi hmingthang Farnell hian an hremna hi khingletin thiam a chang a, kar nga chhung hrem ni ta zawkin hrem a nihna hi September 14 khan a hmang zo a ni. 

Coca-Cola, P&G, McKinsey leh Dubai sorkara hna sang tak chelh ṭhin El Kashashy hian Think Food company a nei mek a, Farnell nen hian Staunch Partners Limited company-ah an thawk dun sa bawk. 

Premier League club zinga kalphung pangngai ber pawla sawi Burnley hian an kalphung avangin fak hlawh viau mah se club chairman Mike Garlick leh coach Sean Dyche-te chu tun hnaiah an inhmu lo. 

Kum 49 mi Dyche hian Garlick hi transfer bazar-a sum hman tur pe tawk loah a puh a, Brighton midfielder Dale Stephens chu season ṭan dawna an player lakluh awmchhun a ni - Joe Hart, Aaron Lennon leh Jeff Hendrick an chhuahtir thung. 

Burnley hian tun season-a league match nga an khelhah point khat chiah an la nei a, neitu thar an neih chuan thlasik transfer-ah sum hman tur tam zawk neih theih an inbeisei ang.