Boxing Crolla beiseina a chuai

British boxer rothap Anthony Crolla chu hliam vanga rei tak a chawlh hnuin Inrinni khan inhnek turin a lo kir leh a, a lo kir lehna inhnekah hian chak result hlawhchhuak zo loin a khingpui Darleys Perez nen in draw-ah puan a ni.

Kum 28-a upa Crolla leh Colombian boxer Perez te hian WBA lightweight title an inchuh a, thla sarih liamtaa rukru kut a tawrh vanga chawl reng Crolla-a'n khel hmuhnawm viau mah se judge te'n 116-111, 114-113, 113-113-a result an puan avangin Perez a kawnghren hren lai hi a chhuhsak zo ta chuang lo a ni.

Kum 31-a upa Perez hian vawi 34 inhnekah vawi khat chiah tlawm hmel a la hmu a, a record duhawm a chhawmnung zel. Crolla erawh vawi 36 inhnekah vawi thum a khingpui a inhnehtawkpuina a ni ta a, vawi 29 chu chak zawkah a ṭang.

Manchester Arena-a inhneka mipui ṭan rawn Crolla-a'n chak result a hlawhchhuak zo lo hi ṭhenkhat chuan an vuipui nasa hle. Langsar taka Mayweather cho ṭhintu British boxer tho Amir Khan chuan judge ho point pek dan chu fiamthu ang chauh nia a hriat thu a sawi a, middleweight champion hlui Joe Calzaghe chuan Crolla chu chak zawkah a ngaih thu a sawi ve bawk a ni.

Hetihlai hian Inrinni-a inhnek dangah Carl Frampton chuan IBF super-bantamweight title a kawl lai humhim turin Alejandro Gonzalez Jr chu 116-108,116-108, 115-109 in a hneh.

Kum 28-a upa Frampton hi inhnek ṭan tir lamah a khingpui Mexican boxer hian vawi hnih lai tuk thlu mah se insiamṭhain a tawpah a chak zawk a ni leh thei ta a ni.