Benitez-a hnuaiah Real chak lo

International Cham­pions Cup-ah Real Madrid leh AS Roma ten hun pangngaiah goal an khung lo a, penalty shootout-ah 7-6 in Italian club Roma an chak.

Inrinnia Melbourne Cricket Ground, Austra­lia-a inkhelah Real keeper Keylor Navas-a'n Spanish keeper Iker Casillas hak ṭhin jersey no. 1 a rawn ha a, Spanish club hian Espanyol aṭanga Kiko Casilla an lakluh bawk avangin tun season atan chuan United keeper David de Gea lamah an awn lutuk tawh loah a ngaih theih.

Casilla hi Real Madrid youth system chhuak a ni a, Espanyol lama an hralh chhuah khan Real hian neitu nihna 50% an la nei reng a, neitu nihna pum­hlum nei turin Real-in pound maktaduai 4.2 an seng.

Manchester United-in keeper De Gea chhuah turin Spanish defender Sergio Ramos lak an phut a, Ramos hian Real tan captain armband a hreng bawk. Player manto Cristiano Ronaldo leh Gareth Bale ten bul an ṭan a, Real-in goal an khung phah lo.

Real tu nge inlan?

Real Madrid XI: Navas, Marcelo (Arbeloa - 46), Ramos (Pepe - 46), Varane (Nacho - 46), Carvajal (Danilo - 71), Odegaard, Modric (Isco - 46), Bale (Vasquez - 55), Illarramendi (Silva - 55), Ronaldo (Benzema - 46), Jese (Cheryshev - 46)