FIFA buaina Suma FIFA ṭanpuitute an ngawi thei tawh lo

FIFA sponsor tu lian ber zinga mi Coca-Cola chuan thuchhuah siamin FIFA insiamṭhatna turin FIFA mi leh sa telna ni lo commission din an rawt.

America rama drinks lam company lian ber pawl Coca-Cola hian July 9 khan an ruahmanna hi thlawp turin FIFA hruaitute an lo ngen tawh a, tunah thawm an rawn nei leh ta a ni.

Coca-cola chuan commi­ssion din thar chu FIFA kalphung leh rorel dan te enfiah tura an duh thu sawiin, FIFA chhungkua siamṭha turin hma la se an duh thu an sawi a, chutih rualin commission din a member-te chu hmingchhiatna leh hminghliauna la nei lo mai bakah FIFA chhungkuaa mi ni lo se an duh thu an sawi.

FIFA hian vawiinah mee­ting an nei dawn a, an mee­ting-a an thu ngaihtuah tur langsar ber chu FIFA president thar thlanna neih hun tur a ni ang. Hetih rual hian FIFA chuan executive committee leh president te hna chelh chhung rei zawng tur te leh FIFA-a senior official-te hlawh zat vantlang hriata puanzar chungchangte an rel bawk ang.

May thla khan FIFA thawh­pui lian tak tak Adidas, Gazprom, Hyundai, Kia, McDonald's, Budweiser, Coca-Cola leh Visa te chuan 2022 World Cup inpuahchah nana World Cup thleng tur Qatar-in an mi chhawrte an chhawr dan sawifiah turin FIFA chu an lo phut tawh a ni. Qatar hi stadium sak nana hlawhfa an chhawr te enkawl ṭha tawk loah puh an ni.

International Trade Union Confederation hruaitu Sharan Burrow chuan, "Coca-Cola hian eirukna an do zia tilang turin FIFA hmaah an thil ngiatte an tilang tawh a, an ni anga hmalak hi FIFA thawhpui dangte hian an ti ve tur a ni," tiin sum hmanga FIFA pui ṭhintu company-te chu hma la ve turin a ngen.

FIFA siamthar a nih theih nana campaign group din thar New FIFA hruaitu Jaimie Fuller pawhin Coca-Cola hmalakna hi fakin eirukna do kawnga an hmalakna chu huaisen thlak a tih thu leh fak tlak a tih thu a sawi.

Hetihlai hian FIFA thawhpui dang McDonald's pawh an ṭawngchhuak a, fast-food company lian chuan, "Khawvel hmun hrang hranga min dawr ṭhintu te'n football an ngaina tih kan hriat avangin kum 20 chhung FIFA hi World Cup-ah kan lo thawhpui tawh a, mipui rinna leh beiseinate ti hlawhtling tura inthlak danglam hi tunah chuan an kutah a innghat ta. FIFA thar leh ṭha zawk kan hmuh theih nan hma an lak ngei kan beisei a ni," tiin thuchhuah an siam.

Coca cola leh FIFA thawh­pui hrang hrangte hian kum li dana World Cup neih a nih apiang hian World Cup hlawhtling tak neih a nih theih nan pound tluklehdingawn khat vel chu an thawh ziah a ni.