Steven Gerrard a la tar lo
Liverpool captain hlui Steven Gerrard-a'n Inrinni khan a club thar Los Angeles Galaxy tana a MLS match hmasa ber a khel a, goal khat khungin penalty a hlawhchhuak a, a ṭhiante thun tur a siamsak bawk.
LA Galaxy leh San Jose Earthquakes inkhelah hian mikhual team San Jose-in 2-0 a hma an hruai hnuin Galaxy tan Gerrard a inlar a, kum 35-a upa England captain hlui hian a la tar lo tih a tilang. Minute 30-naah Gerrard hian penalty a hlawhchhuak a, Liverpool-a a khelhpui ṭhin Robbie Keane chuan goal-ah a chantir. Minute sarih a liam hman chauh tihin Gerrard bawk kan hmu leh a, Liverpool fan-te atchilh rawn hian an siphurh sutna goal a khung.
Minute 64-naah LA Galaxy-in free kick an hlawh a, a pettu chu Gerrard a ni. English midfielder ball pet hi Galaxy captain Keane chuan lo chang fuhin goal-ah a chantir. Gerrard a khel ṭha tulh tulh a, crossbar a pet per hnu lawkah goal dang a khung. A goal khung erawh San Jose player foul vangin pawm a ni lo a, Galaxy-in penalty hlawhin Keane-a bawkin a pet goal.
Hun tawp nan minute hnih chiah a awm tawh tihin Gerrard lakchhuah a ni a, StubHub Center-a inkhel en tura pungkhawm mipui ten dingchungin an zahna an lantir.
He inkhela Liverpool logo chuanna shin-guard buntu Gerrard chuan, "Ṭha taka bul ka ṭan theih avangin ka lawm hle a, fit taka inkhel thei turin ka inpeih ṭep tawh a ni. Kan boss Bruce Arena khan minute 60-na velah khan 'engnge i an?' tiin min rawn au a, mah se ka hre lo der a ni," tiin lain fit chiang lo mah se inkhel nuam a tih thu a sawi.
Liverpool-a inkhelhna hmun a chan tam loh tur thu Brendan Rodgers-a'n a hrilh vanga Galaxy pantu Gerrard chuan, "Naupang inkhel thar hlim ang mai niin ka inhria. Field chhuahsan kha ka duh lo a, a tam thei ang ber khelh ka duh a ni. He hmuna ka rawn kal chhan pakhat chu game kan khelh apianga bul ṭan leh a tam thei ang ber inkhelh a ni," a ti.
Team kaihhruai a thiam vanga 'Captain Fantastic' hming an phuahsak chuan, "Squad player satliah mai nih hi ka duh lo. Inkhel turin ka taksa a la chak ṭha tawk a, inkhelh hi nuam ka la ti reng a ni. Training rim taka neihte hi nuam ka ti a, he hmunah hian ka tlangnel tawh hle a ni," tiin Galaxy player pawimawh ni tura US pan a nih thu a sawi.
Gerrard chuan Liverpool-a thla ruk chhung a lo khelhpui tawh Keane hming sawi langin, "Robbie leh kei hi Liverpool aṭang khan kan in man tawh em em a, player ṭha tak khelhpui chuan in man hi a awl lehzual a ni. Robbie hi player fing tak a ni a, kan game kalphung kan inhre em em a ni," a ti.
Liverpool fapa chuam Gerrard hian Thawhlehni khan US Open Cup-ah Galaxy tana a competitive match hmasa ber a lo khel tawh a, Inrinnia a MLS match hmasa ber hi Galaxy tana competitive match-a bul a ṭan hmasak ber a ni bawk. Tun season MLS-ah match khata goal khung,ṭhiante thun tur siamsak leh penalty hlawhchhuak thei hi Orlando City Brazilian player ropui Kaka leh Serie A star ṭhin Sebastian Giovinco te chiah an ni.
Gerrard-a MLS match hmasa ber hi LA Galaxy player hlui leh a club hlui hi pan ve tura Gerrard rawntu David Beckham chuan a hmunah a en.