Tualchhung Badminton Aizawl Open 2015-ah Muanawma a champion

Inrinni khan District Bad­minton Association Aizawl South (DBAAS) buatsaih Aizawl Open 2015 chu Kuli­kawn Hall-ah khelh zawh a ni.

Mipa inelnaah Mizo­ram Police BC player Lal­muan­awma'n amah ang bawka Police player Samuel Lalnunmawia chu final-ah hnehin a champion. Hmeichhe inelnaah Electric BC player ve ve, Lalrinzuali leh F. Van­lalhriati ten final an lut a, Vanlalhriatpuii a chak zawk.

Mipa single champion Muanawma hi kumin aṭang­in kum 35 chunglam inelnaah a khel thei ṭan a, tun ṭumah hian inelna pathum - single, double leh 35+ ah te a cham­pion. Badminton-ah chuan category pathuma champion hi 'triple crown' tih a ni a, Muan­awma record hi a ropui hle.

Aizawl Open 2015 hi Joint Director Fisheries, Agriculture Crop, ICT, ICPS, Sonata Music School, Rin­dika Ralte (Zarkawt), Ricky (Armed Veng), Majumder (Kulikawn) leh K. Lalnghakliana filling Station, Ngaizel te sponsor a ni.

Tun ṭum inelna hi category 11-ah ṭhendarh a ni a, result kimchang chu a hnuaia tarlan ang hi a ni.

Aizawl Open 2015 hi Mizoram Badminton Association hnuaia ranking tournament a ni a, tun season-a ranking tournament pahnihna a ni. May thla khan DBA Inter Club neih a ni tawh a, tun season-ah MBA Junior Championship, Masters Championship, Womens Wing Tournament, Saiha Open leh Inter District Tournament te chu neih hmabak a ni.
Mipa lamah Aizawl Open champion MPBC player Lalmuanawma chu rank no. 1 a ni a; Samuel Lal­nunmawia (MPBC), Lalbiaksanga (MPBC), Zarzokima (Lalat BC) leh Lalduhawma (Lalat BC) ten an dawt. Hmeichhe ranking-ah Aizawl Open-a pahnihna Lalrinzuali chu hmahruaitu a ni a, tun ṭuma champion F. Vanlalhriatpuii'n a dawt a, an hnuaiah hian Lalduhzuali (KODBA), Lalhlunchhungi (KODBA) leh Ponty Lalramtluangi (EBC) te an awm ve bawk.