CCC leh Ayush an inrem

Cricket Asociation of Mizoram hnuaia club hlun tak Chanmarians Cricket Club leh National AYUSH Mission chuan nimin khan thawhhona an ziak.

He inremna ah hian Chanmarians Cricket Club chuan National AYUSH Mission hmalaknate an tihlar sak ṭhin dawn bakah AYUSH Physical & Stress Management Class hmangin training-te an nei ṭhin dawn a ni. Players inhliam leh enkawl ngaite an awm chuan AYUSH damdawi hmanga enkawl ṭhin an ni dawn a, AYUSH lam hian sports medicine in zirtirna leh seminar te thlenga buatsaih an tum bawk.

AYUSH  deputy director Dr. S. Mara Thansiami chuan "Sports Medicine atan hian AYUSH damdawi tam tak hi Olympic-ah te hial ṭangkai taka hman a lo ni tawh a, Mizoramah kan kalpui ve thei tur hi kan vannei hle. CCC bakah Mizoram Badminton Association leh Aizawl FC te nen thawhhona ṭha tak kan nei mek bawk a, Chanmarians Cricket Club nena kan thawkho thei hi kan lawm takzet a ni," tiin a sawi.

He inremna thu-thlungah hian Dr. S. Mara Thansiami  leh Chanmarians Cricket Club president LV Lalthantluanga ten an hming an ziak a ni.