Hmasial luat vang a ni - UEFA Vice President

European football-a thuneitu sang ber UEFA vice president Fernando Gomes chuan tun hnaia thawm nei ring tak European Super League a sawisel a, "Hmasialna leh duhamnain a hrin chhuah duhawm lo tak a ni," tiin a insum lo. 

Kar hmasa khan European Super League ruahman tura kalpui a nih thu hi puanzar a ni tawh a, he inelna kalpuitu turte hian club 18 neih tumin England, France, Germany, Italy leh Spain-a club liante an dawr tawh. 

Barcelona president chhuak ta Josep Maria Bartomeu chuan a chhuah pahin Catalan club chu ESL-a an tel tur thu a sawi zauh a, hei hian European Super League chungchang sawina a ti ring lehzual. 

UEFA hotupa chuan, "Khawvelin hun khirh leh harsa tak a tawng mek a, mahni hmasialna leh duhamna hmanga hmalakna a mamawh loh lai tak a ni. Ka ngaihdan chuan he inelna hi pawl zawng zawngin an hnawl vek a ṭul," a ti. 

Arsenal manager hlui Arsene Wenger pawhin hemi chungchang hi lo sawi tawhin, "English club-ten rem an tih chuan he league hi a kaltlang ngei ang," a ti a, sum tamna English club an pawimawh tur thu a sawi. 

Tun dinhmunah chuan English club lian pahnih Liverpool leh Manchester United hming a ri ring ber a, Arsenal, Manchester City, Chelsea leh Tottenham Hotspur pawh sawi rik zingah an tel. 

Hetihlai hian FIFA chuan, "League kalphung pangngai leh ṭha tak, engkim a awm sa avangin FIFA chuan European Super League tia an sawi chungchangah hian engmah sawi a tum lo," an ti. 

FIFA hnuaia  Chief of Global Football Development hna thawk mektu Wenger chuan ESL chu Premier League tihchhiat nana thil ṭha tak a nih thu a lo sawi ve bawk. 

Wenger chuan, "League dang hian Premier League ropui bikna hi tihtawp an duh a, chumi tura an tana kawng awlsam ber chu European league hi a ni," tiin ESL chu English football tan a ṭhat loh thu a sawi.