A danglamna inhmuh loh chuan in mit a del a ni ang - Dortmund coach

Borussia Dortmund chuan kar liam ta khan ropui takin Augsburg 5-3 in an lehthal a, player thar Erling Haaland-a'n bench ṭanga lutin hattrick a siam. Zanin dar 1:00 hian Dortmund-in an mualah FC Cologne an mikhual dawn a, mipui mit fukna tur chu Haaland bawk a ni ang.

Dortmund manager Lucien Favre erawhin Cologne an khelh hmaa player chanchin a sawi rei ber chu Haaland ni loin kum 17 mi Gio Reyna a ni thung a, American midfielder hi Augsburg nen khan bench ṭanga lutin Norwegian striker hattrick siamna goal-ah a inrawlh.

Favre chuan, "Gio Reyna hian training-naah thiamna danglam bik a nei tih a lantir. A chet dan a dik a, khelh dan turin dikin a khel a, a kum ngaihtuah chuan tih theih a ngah tawh hle. A danglamna hmu thei lo chu an mit a del a ni ang," tiin a fak hle.

Reyna hi senior team-ah sawn chhoh a ni a, Augsburg nen an inkhelh zawh hian Dormund instagram account-ah chuan 'American zinga Bundesliga khel thei naupang ber. A hming chhinchhiah rawh' tiin an ziak. Dortmund attacking midfielder hian tun season U19 Bundesliga match 11-ah goal li khungin assist vawi sarih a nei. Dortmund rawlthar duhawm pahnih Reyna leh Haaland te hi Claudio Reyna leh Alf-Inge Haaland te fapa a ni a, an pa te pahnih hi kum 2003 khan Manchester City tan an khel dun ṭhin.