Champhai khawpuiin MSL X an thleng dawn

Sharda University Mizoram Super League-X chu Champhai khawpuiin a thleng dawn - zanin dar 7:00 hian match hmasa ber khelh a ni dawn a, khawtual club Champhai BC leh Khatla TBL an inhmachhawn ang.

Khatla TBL-in Mizo basketball legend H. Laldinsanga (Mapuia) kaihhruaina hnuaiah MSL an thunun leh mek a, tun season-a match thum an khelh tawhah an la chak vek - fans ngah Champhai BC nena an inkhel tur hi en a châkawm hle.

Khatla TBL player Nary James ringawt pawh hi Champhai mipui tan VANIS-a punkhawm chhan a tling dawn a, tualchhung player ṭha Emmanuel VL Awmpuia leh Vanlalṭhazuala te hoin Champhai khawpuia hming chher an châk dawn bawk.

MSL Board-in Champhaia inkhelh hun an ruahman hi thil thlen dan avangin a fuh lehzual - hmahruaitu Khatla hnuai chiahah Champhai an awm a, point khat chiahin hmahruaitu an phak lo. Zaninah an chak chuan MSL table chung ber luah chungin Champhai MSL chu an khar thei dawn.

Champhai mipui tan an club tana khel Dee Franklin hi hmuh châkawm a tling a, ani hi Denmark, Kosovo, Iceland leh Chile league thlenga lo khel tawh a nih avangin a ṭha tih a chiang - tualchhung player ṭha tak tak an kawl bawk.

Mizoram Basketball Association (MBBA) general secretary Zomuanpuia chuan, "Champhai District Basketball Association-in kuminah silver jubilee an hmang a, a lawmna chi khat atan MSL hi thlen an duh. MSL-in kum 10 kan tling chiah bawk. Hei bakah Champhai hi Aizawl pawn aṭanga MSL-a club nei awmchhun an ni a, hengte avang hian keinin an thlen ve hi awm kan ti bawk," tiin Champhaia MSL nghah chhan a sawi.

Zomuanpuia chuan, "Stadium khatin zan tin fans an punkhawm theih kan beisei a, Champhai khawpui pawh he inelna thleng tur hian an inbuatsaih ngawrh hle. Hotel-te pawh Champhai lam kan hotute ngenna angin MSL club-te a man tlawm zawkin an thlentir dawn niten kan hria a, kan lawm hle," tiin Vanglaini a hrilh - a hmunah ticket lei theih a ni ang.