MFA Cup final-ah Thangzuala Mem FC Vs Electric FC

18th March, 2025

MFA Cup 2025 final chu zanin dar 7:30 hian Thenzawl club Thangzuala Memorial FC leh Kolasib club Electric FC ten Chhangphut Field-ah an khel dawn.

Floodlight hnuaiah semifinal khelh tum a ni a, a chawmtu generator a chhiat avangin zan lamah inkhelh theih a ni lo. Final khelh theih nan generator dinhmun enfiah a ni a, nimin lam khan siam ṭhat a ni.

Final-ah Thenzawl club

Semifinal hmasa zawk first half hi Inrinni khan khelh hman a ni a, Serchhip aiawh Thangzuala Memorial FC-in Roben-a goal hmangin hma an hruai. Nimin khan second half khelh chhunzawm a ni a, MLS FC aiin Thenzawl club-in bul an ṭan fuh zawk.

Mual dinglam aṭanga Vanlalthanga cross chu goal zawnah kalin MLS keeper Lalvanlawma tan awlsam taka man theih tur niin lang mah se goal-ah a lut. Minute 54-naah Thangzuala Memorial FC-in 2-0 in hma an hruai a, minute 75-naah VL Thanga ball pek chu Roben-a'n khung lehin 3-0 a ni.

Champion lai MLS-in tha an thlah duh bik lo a, minute 84-naah mawi zeta tlarhnung ṭhiatin M. Lalpektluanga'n siphurh a sut ṭhen. Injury time-ah Lawngtlai club tan HC Willia-a'n a tauh lut a, draw beiseina nei thar mah se a tlai hret tawh. Coach Vanlalpeka hoten nomawi an hum thei lo a, Thangzuala Memorial FC lakah 3-2 in an chak lo.

Kolasib an vul

Veng leh veng inelna liana champion Kolasib-in club inelna lian MFA Cup-ah pawh final an thleng. Nimin khan Kolasib club Electric Veng FC chuan group stage-a khingpui zawng zawng hnehtu Khawzawl club Vengthar GSA chu 1-0 in an hneh.

Electric FC leh Vengthar FC te an inkhel tawk a, minute 90 chhungin goal a lut lo. Kolasib-in extra time second half ṭan chiahah Vanlalnghaka tauh luh mawi zet hmangin goal an khung hmasa. Inkhel pumpui thlira khel ṭha zawk Lalnaua hoten na takin an nawr let a, Vanlalremruatfela'n (RF-a) goal ban a pet per bakah Rooney Malsawmdawngkima Ralte pawh a hlauhawm hle.

Kolasib club an ṭangtluan a, extra time-ah 1-0 a chakin final-ah group stage-a 3-1 a an hneh tawh Thangzuala Memorial FC an hmachhawn dawn. Inkhel hmuhnawm bik chhawpchhuah a ni ang.