Atletico lakah Barca an 'comeback'

Barcelona chuan Atletico Madrid lakah goal hnih chhuah hmasa zet mah se, an 'comeback' a, Catalan club hian an mikhualna ramah 4-2 in hnehna an chang - La Liga table chung ber an luah leh ta.

Champions League round of 16-ah Real Madrid-in an pet thla zo chauh a, Atletico-in La Liga-ah champion tura an elpui Barcelona an mikhual zui - Julian Alvarez leh Alexander Sorloth ten goal an khung a, 2-0 a ni hman.

Mahse, Barcelona tan Ferran Torres chuan goal hnih khungin, Robert Lewandowski leh Lamine Yamal ten goal khat ve ve an thawh bawk a, kut ruakin an haw dawn emaw an tih hnuah hnehna an chang daih.

Hmahruaitu Atletico

Atletico-in UCL-a Real an ngam loh rilru na thawidam nan chak an tum a, Barcelona lakah minute 45-naah goal hmahruai an khung - Giuliano Simeone siamsak chu Julian Alvarez chuan goal-ah a chantir a, 1-0 in chawlhlawk an hmang.

Kum 25 mi Alvarez tan tun season-a goal 23 a khungna chiah a ni a, heti zat khung tur hian match 44 a mamawh a, assist vawi nga a nei tel bawk. Pound maktaduai 100-a ngamtu nia an sawi Liverpool chil put a zual ang!

Second half-ah pawh Atletico bawkin an khung belh a, Conor Gallagher-a siamsak chu Sorloth chuan goal-ah a lo chantir. An mualah 2-0 in hma an hruai a, Atletico ṭantute thla a muang tawh.

Barca an tho

Mahse, Atletico thla a muan tawh hnuah Barca an insangmar! Sorloth-a goal khung vanga an hlim au thawm pawh a reh fel hmain Lewy chuan Barca tan si phurh a sut ṭhen a, Torres-a'n a belhchhah zui - goal hnihna an chhuah aṭanga minute riat chhungin si phurh an sut zo der.

Atletico tan Sorloth-a'n chakna goal khungna remchang nei mah se, a chhawr lo zui a, hrem an ni zui - hun pek belh minute hnihnaah Yamal chuan a 'class' pholangin hmahruaina goal a khung a, Torres-a'n minute riatnaah chak a nemnghet zui.

Kum 17 mi Yamal hian tun season-ah match 38 khelin goal 13 leh assist 17 a nei tawh a, kum 36 mi Lewy-a'n match 40-ah goal 35 khungin, assist vawi thum a nei. Torres pawhin match 32-ah goal 13 khung a, assist vawi thum neiin, a career-a season khata goal a khung hnem ber record a nih rual tawh.