Leverkusen an la beidawng lo, an chak

Bayer Leverkusen chuan Pathianni zan khan VfB Stuttgart laka 3-1 a an hnufual hnuah 4-3 in an lehthal a, Bundesliga-ah hmahruaitu Bayern Munich chu point ruk chauhin an pha lo. Xabi Alonso hoten Bavarians lakah nomawi awlsam taka pek let an tum lo tih a lang.

Bundesliga-ah hian team 18 chauh an awm avangin season khatah match 34 chauh a awm a, tunah hian match 26 khel tur niin match riat chiah khelh tur a awm tawh a ni.

A goal tam

MHPArena-ah mualneitu lamin bul an ṭan ṭha a, minute 14-na lekah VfB Stuttgart tan Ermedin Demirovic-a'n goal hmahruai a khung. First half-ah Leverkusen an insiamrem thei lo a, Stuttgart-in goal khung belh theihna remchang an nei zawk.

Second half-ah pawh Stuttgart tho an che ṭha hmasa a, Nick Woltemade-a'n minute 48-naah a khung belh. Leverkusen an buai a, Inrinni zana Bayern chak loh an hmang ṭangkai dawn lo niin a lang.

Leverkusen erawh champion lai an ni a, an tlawm mai lo. Jeremie Frimpong-a'n box chhungah ball per chang fuhin minute 56-naah siphurh a sut ṭhen. Mahse, Granit Xhaka-a'n minute 62-naah an lamah a tilut a, Stuttgart 3-1 in hma an hruai leh ta tho.

Minute li hnuah Piero Hincapie-a'n goal rawn khung lehin 3-2 a ni a, hun tawp dawn thlengin goal a luh belh lo. Minute 88-naah Stuttgart midfielder Angelo Stiller-a'n an lamah a tilut a, 3-3 a ni.

Injury time-ah Frimpong-a cross chu Patrik Schick-a'n a tauh lut a, 4-3 a ni. Leverkusen hian nawr zelin Victor Boniface-a'n crossbar a pet per leh a, an huaisen zarah point thum an hlawh chhuak.

A hot dawn

Bayern hian point 62 an hmu a, Leverkusen-in point 56 an hmu thung. Goal difference-ah Vincent Kompany hote hi an fal deuh avangin Xabi Alonso hote tan chuan table chung bera awm turin match thum tal a ngai a, thil harsa chu ni mah se thil theih a la ni.

Bayern hian FC St. Pauli, FC Augsburg, Borussia Dortmund, FC Heidenheim, Mainz 05, RB Leipzig, Borussia Mönchengladbach leh TSG Hoffenheim te an la hmachhawn dawn. Kompany hote hian VfL Bochum leh Union Berlin laka point an hloh miau avangin point la hloh thei an ni tih a chiang.

Leverkusen hian Bochum, Heidenheim, Union Berlin, St Pauli, Augsburg, SC Freiburg, Dortmund leh Mainz te an la hmachhawn dawn a, Alonso hote tan pawh chak vek a harsa ve tho ang.