PSG an champion dawn?

Champions League aṭanga Liverpool pet chhuaktu Paris Saint Germain chuan Ligue 1 nomawi an chawi ngei dawn niin a lang - anmahni hnaih bertu Marseille chu 3-1 in an hneh.

Pathianni zan khan Paris khawpuiah inkhel pawimawh bik a awm a, pahnihna ni lai Marseille tan PSG nen an inkar sawr zim theihna remchang a ni. Mahse, Paris club hian Ousmane Dembele leh Nuno Mendes ten goal bakah Pol Lirola chuan anmahni lamah ti lut bawkin, an mikhual lakah zahngaihna an lantir lo.

Luis Enrique naute hian point 19 tehmeuhin hma an hruai fal tawh, an league hmabak pahnih a hnehna an chan chuan a vawi 13 nan an champion fel der ang; Saint-Etienne leh Angers te an tum dawn a ni.

PSG hian Ligue 1 bakah hian French Cup leh Champions League nomawi an la beisei mek a, nomawi lian pathum chawi thei dinhmunah an ding mek a ni.

France ram chhunga inelna hrang hrangah chuan PSG hi an champion tam tawh viau, club neitu lamin an duh tak chu UCL a ni. Barcelona hlawhtlinpui tawhtu Enrique leh a naute hian quarterfinal-ah Aston Villa an hmachhawn ang.