Benteke man zat Liverpool-in an ngam

Nipui transfer inhawn ruala Liverpool-in an hel nghal chat Aston Villa striker Christian Ben­teke an la lut dawn.

Belgian striker hi a contract neih lai ang chuan pound makta­duai 32.5 aia tlawmin a lei theih loh. Liverpool-in club lian tan la khel lo leh inhliam hrat ve tak Benteke man zat atana heti zat thehchhuah hi an remti lawk lo a, man tlawm zawka lakluh dan an ngaihtuah.

Villa-an tawlhhnung duh si lo a, an chhiarna man zatin Liverpool hian an lei ngei dawn niin an lang ta. Pound maktaduai 49 laia Raheem Sterling hralhtu Reds hian pawisa an nei a, striker an mamawh bawk si avangin Benteke man zat atan pound maktaduai 32.5 an thehchhuak ngam hi a mak lo.

Striker mamawh Liverpool

Liverpool-in an striker chhuan­vawr Luis Suarez an chhuahtir hnuin a thlakna tur an hmu zo lo. Milan aṭangin pound maktaduai 16 man Mario Balotelli an la lut a, Italian striker hian Anfield-ah beisei a phak lo. Vawi 28 inlanah goal li khungin Lazio leh Fiorentina nen sawizawm mek a ni.

Suarez nena hlawhtling taka lo inkawp tawh Sturridge hi season hmasaah inhliam vangin a buai a, vawi 17 chiah inlan theiin goal nga a khung. A season hmasa chiaha vawi 33 inlana goal 24 khung thei striker hian hliam vangin ngai a awh lo tih a hriat. Kuminah September thla thleng a hliam vang bawk hian a chawlh a ngai dawn a, Reds tan innghahna chi a ni lo.

Burnley aṭanga Reds zawm thar Danny Ings hi striker pangngai tak nimahse Liverpool elpui club striker Wayne Roo­ney, Sergio Aguero leh Diego Costa te nena khaikhin chuan a la puitling tawk lo.

Fabio Borini leh Rickie Lambert hi season hmasaah Rodgers-a'n a ring tawk lo tih kan hmu tawh a, tun season-ah club dang pan tur anga sawi an ni. Divock Origi hi rinrawl tur chuan a la naupang mah mah bawk.

Liverpool striker neih dan thlir chuan Benteke hi Reds mamawh chhanna a ni thei.

Tunge Benteke?

Belgium international stri­ker hian kum 2012 khan an ram club Genk aṭangin Villa Park hi pound makta­duai 7-in a pan a, Villa-in an tisual lo.

Genk tan vawi 41 a inlana goal 20 khungtu hi Premier League-a a season hmasa berah Villa tan league match vawi 34 khelin goal 19 a khung. A season hnihnaah pawh Benteke a che chhe lo, league match vawi 26 khelin goal 10 a khung.

Season hman zawh takah Villa an talbuai a, inhliamin a tibuai bawk nen Benteke-a'n beisei a phak lo. Mahse, Aston Villa-in manager atan Tim Sherwood an ruat hnuah Benteke-a'n ngai a awh chho a, tlak hlauhawm dinhmuna an din laiin vawi 12 inlanah goal 12 a khung a, Premier League khel zel turin Villa a chhanhim.

Villa tan vawi 101 a inlana goal 49 khungtu hi Premier League club lian ten an hmu tai nghal a, thawm nei na ber erawh Liverpool an ni.

Bazar nasa Liverpool

Season hmasaa beisei phak lo Liverpool-in player thar an la nasa a, tun nipui transfer-ah Southampton aṭangin right-back Nathaniel Clyne, Bolton aṭangin goalkeeper Adam Bogdan, Charlton Athletic aṭangin rawlthar defender Joe Gomez, Hoffenheim aṭangin Brazilian forward Roberto Firmino leh Burnley aṭangin striker Danny Ings te an lalut tawh a, an la bazar dawn chauh niin a lang bawk.

Liverpool manager Rodgers chuan City lakah Sterling chan mah se player ṭha hoin Liverpool-a khelh an la chak reng thu sawiin, "Liverpool hi club lian leh ropui tak a nih avangin khawvela player ṭha ber ber ten kan hnena khelh hi an la chak reng a ni. Kan tum ber chu khawvela club ṭha zinga tel leh a ni a, kan tumna hian player tam tak a hip a ni," tiin Champions League khel lo tur Liverpool chuan player ṭha an la hip reng thu a sawi.