Aizawl DFA Club 48 An chiang ta

Aizawl District FA (ADFA) chuan season thar aṭangin club 48 leh zone pasarih an enkawl dawn.

Season hman zawh tak­ah khan Aizawl DFA hian zone hnuaia club tiam loin club 73 a enkawl a, 2015-16 season aṭangin club 57 awm­na third division chu club 32 awmna atana duan a ni.

Aizawl DFA hian kum hmasa result aṭangin club 30 a thlang chhuak a, club dang pahnih hi play­off hmanga zawn a ni.

Ningani khan Third Division Playoff hi khelh zawh a ni a, Dinthar FC Jr leh Ramhlun FC an tling.

MPL season hmasa ber champion Dinthar FC-in an junior team hi player beiseiawm chher hriam nan an hmang thei ang a, MPL U17 team an khelh tir thei bawk ang.

MPL1 champion Dinthar FC ang bawk hian MPL3 champion Aizawl FC Academy chu first division-ah an khel a, second division club 1st.Bn MAP Academy chu Mizoram Police hnuaia awm an ni bawk.