FIFA buaina Swiss thuneitu ten FIFA hruaitu US hnenah an hlanchhawng

Switzerland chuan FIFA hruaitu eiruk thubuai vanga an man mi pasarih zinga pakhat chu US sorkar hruaitute hnenah an hlanchhawng.

Swiss sorkar hian US Depart­ment of Justice-in thubuai a siamsak mi 14 zinga pasarih chu FIFA headquarters awmna Switzerland khawpui Zurich-ah May 27 khan an man a, US sorkar hnenah hian tuna mi pakhat tih loh hi an la hlanchhawng rih lo.

US sorkar hnena FIFA hruaitu an hlanchhawn hi a hming puanzar ni lo mah se khawthlang media-te chuan CONCACAF president hlui leh FIFA vice president hlui Jeffrey Webb niin an sawi.

Swiss Justice Department chuan US sorkar hnena an hlan­chhawn FIFA hruaitu hi police pathum venhimna hnuaiah New York khawpui an hruai thleng niin an sawi a ni.

Kum 50-a upa Webb hi marketing rights chungchangah dollar maktaduai tel thamna sum la a puh a ni a, US lama la hruai ve loh FIFA hruaitu dang paruk hian thubuai an neihna US sorkara hlanchhawn an nih loh nan hma an la mek bawk.

Hetihlai hian FIFA chuan May thlaa eiruk thubuai vanga a hmingchhiat hnua a vawi khat nan Thawhṭanni hian executive committee an nei dawn a, FIFA president aṭanga bang Sepp Blatter-a aiawh tur thlanna hun leh ni tur an ruat dawn nia sawi a ni.

FIFA president thlanna neih hun tur hian December 16 chu rin ber a ni. President chuh tur erawh thuchiang ala awm lo a, May thlaa Blatter hneh lotu Prince Ali chuan UEFA president Michel Platini-a'n FIFA president hi a chuh dawn a nih chuan chuh ve a tum lo thung niin sawi a ni bawk.