India tana khelh tum rih lo Satnam

NBA draft pick 52-naa Dallas Mavericks-in an lak Indian player Satnam Singh chuan NBA lama chetṭhat a duh vangin India tana khelh a tum rih lo thu a sawi.

Punjab, India-a piang Satnam chuan, "Kum hnih chhung chu India tana khelh ka tum lo. Marvericks first team tana khel turin theihtawp ka chhuah dawn a, hmasawn zel ka duh. Tunah chuan ram tan ni loin NBA lamah chauh ka ngaihtuahna ka hmang ang," tiin a sawi.

2015 NBA Summer League-ah Dallas Mave­ricks-in LA Lakers leh NBA Development League Select hnehin quarterfinal an lut. Atlanta Hawks nen vawiin hian an inkhel leh ang.

Summer league hi season thar atana inpuah­chahna a ni a, NBA huaihawt a ni. 2015 NBA Summer League-ah league pathum a awm a, chungte chu Orlando Magic Summer League, Utah Jazz Summer League leh Las Vegas Summer League te a ni.

Dallas telna hi Las Vegas Summer League a ni a, team 24 an tel. July 10–14 khan preliminary round an khel tawh a, tuna an khelh hi elimination round a ni. July 20-ah final an khel ang.

Dallas-in preliminary round-a New Orleans 90-86 a an hneh loh ṭumin Satnam hi Marvericks tan a inlan ṭan. Match hmasa berah hian Indian tlangval hian minute 10 chhungin point li a score a, rebounds pathumn neiin assist vawi khat a nei bawk.

Match hnihnaah Port­land Trail Blazers chu Dallas-in 93-80 in an hneh a, Satnam hian minute 12 chhung khelin point li a score.

Elimination round-ah Dallas hian 88-86 in LA Lakers an hneh a, Satnam hi first quarter tawp hma minute hnih la awmin a lut a, defensive rebound pawimawh tak a la nghal. Second quarter-ah free throw aṭangin point khat a score a; a luh belh tawh lo.

Second round-ah Dallas hian NBA D-League Select chu 104-88 in an hneh a, Satnam hian minute li chhungin point li a score. Kum 19-a upa Satnam hi a khelh tawh chinah che ropui lua lo mah se India rama piang zinga NBA inziak lut hmasa ber a nih avangin a chanchin hian ngaihven a hlawh hle.