Boro-ah Downing a kir
English winger Stewart Downing chuan a bul ṭanna leh an khaw club ni bawk Middlesbrough chu West Ham aṭangin a pan a, a club hlui lamah hian kum li cham turin contract a ziak a ni.
Kum 30-a upa winger hian nimin khan Boro training camp a zawm ve nghal a, Championship club hian a man zat atan pound maktaduai 5.5 thehchhuakin a khelh ṭhat dan azirin a man hi pound maktaduai 7 thlenga kai chho thei tur a ni ang.
England tana vawi 35 lo inlan tawh Downing hian kum 2009 khan Boro chhuahsain Aston Villa a pan a, Villa Park aṭang hian Liverpool pan lehin beisei anga a hlawhtlin zui loh avangin West Ham lamah Reds hian kum 2013 khan an hralh a, tunah chuan a chawrchhuahna club player a ni leh dawn ta.
Season hman zawh taka Premier League match vawi 37 lai Hammers tana kheltu Downing chuan, "Duhthlan tur tam tak ka nei a, mahse mahni in ngeia kir leh tluk aia nuam hi a awm lo. He club-ah hian kir leh ka duh thu ka sawi fo ṭhin a, tun hi ka duhthusam tih hlawhtlin theihna remchang hmasa ber a ni. Premier League khel leh tura ka club hi ka pui thei anih chuan ka career-a ka thil tawn ropui ber a ni ang," tiin Premier League-ah Boro hi hruai kir leh ngei a tum hle.
West Ham boss Slaven Bilic chuan Downing-a'n Hammers chhuahsan a thlang chu pawi a tih thu sawiin an hnena cham tura a lo beisei ruk thu a sawi. Croatian manager rorum chuan, "Downing hi player ṭha tak a ni a, kan hnena cham turin ka duh hle. Mahse, amah berin a lo chawr chhuahna club lam hi zawm a duh tlat si a, ka dang thei lo a ni," a ti.
Bilic chuan a career-a vawi 493 inkhelha goal 50 khungtu Downing-a'n Upton Park chhuahsan a duh chhan thu sawiin, "Min ngainat thu leh ka hnena khelh a chak thu a sawi a, mahse amah siam liantu club-in kir tura an sawm avangin hnar harsa a ti a ni. 'Min sawmtu hi Boro kher ni lo se chuan ka chhuak lo ang' tiin min hrilh a ni," a ti.
Hetihlai hian kum 35-a upa Jonathan Woodgate chuan Boro-a cham chhunzawm zel turin thutlukna a siam a, season hmasa-a football chawlhsan tum hman English defender hi Boro chuan chawl lo turin an hmin thei a ni.
Kum 2009-a Championship lama an tlak thlak hnua Premier League-a la inhlangkai leh ta lo Boro hian season tharah Premier League an khel teuh hle a, play-off final-ah Norwich City hneh loin vanduai zawkah an ṭang ta a ni.