Hmeichhe World Cup top scorer Sasic-a chawl

Canada-a Hmeichhe World Cup khelh zawh taka top scorer Germany striker Celia Sasic chuan kum 27 leka upa nichungin inkhelh a chawlhsan.

Germany tana vawi 111 lai inlan tawh Sasic chuan lehkha zir chhunzawm a duh vang leh chhungkaw enkawl tur a neih vanga football chawlhsan a nih thu hi a sawi a ni.

Kum 2015 Champions League-a Frankfurt champion puitu Sasic chuan , "Kawng thar zawh ka duh avangin football ka chawlhsan a ngai dawn ta," tiin a facebook page-ah a tarlang.

Germany coach Silvia Neid chuan Germany tana goal 63 khung tawhtu Sasic thutlukna chuan a ṭhawn thu sawiin, "A thutlukna hian min barakhaih takzet a, mahse football piah lamah tih tur tam tak a nei bawk si a ni. Amah vangin game pawimawh tak takah kan chak a, field chhung leh pawn lamah midangte tana entawntlak a ni," tiin Euro champion team zinga vawi hnih tel tawh Sasic chu a thlah.