Tevez-a'n lawmtu a ngah

Kum 11 zet hmun hran hrana a khelh kual hnuah Carlos Tevez chuan Juventus aṭangin a bul ṭanna Boca Juniors a pan leh a; Tevez-a lawmluhna hun hmang turin stadium-ah fans 60,000 zet an pung khawm. A club tharah hian Tevez hian Diego Maradona jersey number hlui number 10 a ha dawn nghe nghe.

Kum 31-a upa Argentine striker hian season hmasa khan Juve chu Serie A leh Coppa Italia a chawi pui bakah Champions League final a thlen pui bawk. Season duhawm tak a hman zawh hnuin kum 2001 aṭanga 2004 chhunga a lo khelh tawhnaah a kir leh a ni. Boca Juniors-a a hun hmasaah hian game 75 a khelh aṭangin goal 26 a khunga, he a thil tih hi fans ten an la theihnghilh lo chiang hle.

Khawvel player ṭha leh lar ten club dang an panin lawmtu an ngah ṭhin hle a, player thar tlangzarhna huna lawmtu ngah ber chu Cristiano Ronaldo niin kum 2009-a Manchester United aṭanga Real Madrid a pan khan amah lawm lut turin Santiago Bernabeu Stadium-ah mipui 80,000 teh meuh an pungkhawm a ni.