An ramah Adu a kir

United States footballer Freddy Adu chu an ram second division club Tampa Bay Rowdies-ah a let. Adu hi kum 26 chauha upa la ni mah se professional club hrang hrang 13-a a khelhna tur a ni ang.

Tema, Ghana a piang US khua leh tui nihna nei Adu hi naupang talent nei ṭha tak a ni a, kum 13 mi chauh a nih laiin Nike-in inremna an siam pui.

Kum 14 a nihin an ram football league sang Major League Soccer-ah a inlan tawh. Kum 2004 khan D.C. United leh MetroStars inkhelh ṭumin goal a khung a; MLS khel thei naupang ber leh goal khung thei naupang ber a ni bawk. Heng mai bakah hian kum 16 a nihin an ram tan a inkhel ṭan tawh a ni.

Attacking midfielder Adu hian club hrang hrang D.C. United, Real Salt Lake, Benfica, AS Monaco (loan), Belenenses (loan), Aris (loan), Çaykur Rizespor (loan), Philadelphia Union, Bahia, Jagodina, KuPS leh KUFU-98 (loan) tan a khel tawh.

Adu hian kum 12 professional football a khelh chhungin match 182 khel tawhin goal 27 a khung tawh bawk.