Robinho-a'n China a pan

Brazil forward Robinho chuan thlaruk chhung cham turin Chinese club Guangzhou Evergrande a pan dawn ta. A club tharah hian Jersey no 60 a ha ang.

Real Madrid leh Man­chester City tan pawha lo khel tawh Robinho hian Brazil tana khelhna hmun chang turin inkhelh tam a duh a, season hmasa khan Milan aṭangin Santos a pan. Santos tan hian match 20 khelin goal ruk a khung a, Dunga hnuaiah Copa America 2015 khan an ram aiawhin a inlan leh a ni.

Kum 31-a upa forward ball thiam hian kum 2008 khan Real Madrid aṭangin pound maktaduai 32.5 (A hunlai British record fee)-in Manchester City a pan. Mahse beisei angin England-ah hian a hlawhtling lem lo, match 53 a khelh aṭangin goal 16 chauh a khung a ni.

Robinho hma hian Tottenham midfielder hlui Paulinho chuan June thla khan Guangzhou hi a lo zawm tawh bawk. Italian Club Milan tan pawha lo khel tawh Robinho leh ram tana a khelh pui ṭhin Paulinho te hi Guangzhou-ah Brazilian coach Scolari enkawlna hnuaiah an inkawp dawn ta a ni.