MPL Transfer Aizawl FC-in Biaktea leh Valpuia an la lut

I League khel tur Aizawl FC-in tualchhung player zingah an it zawng an hlah lo - Mizoram Police inghahna Lalbiakhlua leh F. Lalrinpuia (Valpuia) te an la lut.

MPL3 champion hian Mizoram Police FC duo an lak hma hian Chanmari FC aṭangin winger H. Lalmuankima leh defender Lalruatthara bakah Dinthar FC defender Ronald Zothanzama te an la lut tawh.

Aizawl FC hian nimin tlai khan an facebook page-ah Biaktea leh Valpuia an lakluh thu hi official-in an tlangzarh.

Keifang tlangval Lalbiakhlua hi MPL2 leh MPL3-ah top scorer a ni ve ve a, I League second division-ah loan-in Chanmari FC tan khelin goal 10 a khung a, Lonestar Kashmir FC striker Ajay Singh chiah a tluk lo.

Electric Veng-a cheng Biaktea hi a tlan chak avangin mipui hriat a hlawh a, Mizoram Police tan MPL season thumah goal 23 a khung.

Republic Veng tlangval F. Lalrin­puia hi MPL1 best forward a ni a, MPL season thum chhungin goal 18 a khung. I League second division-ah Chanmari FC tan khelin goal li a khung bawk.

Mizoram Police-in MPL-ah goal 89 an khung a, Police duo hian goal 41 khungin team chakna hnar an nih zia an goal khung hmangin an ti lang chiang hle. Biaktea leh Valpuia hi 2014-a Mizoramin Santosh Trophy leh Dr TAo Football an champion-na kawnga player pawimawh an ni.

Club technical director Hming­thansanga chuan, "Season khat chhung atana Valpuia leh Biaktea kan la lut thei hi kan lawm takzet a ni. Kan bula MPL an khel thei tur hi I League inbuatsaihna atan a ṭangkai khawp ang. Club president Pu Robert leh Board of Governor te chungah player lakluh theihna tur budget min siam sak avangin kan lawm a, chutiang bawkin Mizoram Police hotute leh team enkawltute chungah kan lawm takzet bawk," tiin Vanglaini palai a hrilh.

Season thar thlirin Hmingthana chuan, "Coach hi kan tichiang thuai dawn a, foreigner zingah chuan I League min kaipuitu Alfred-a'n contract a pawtsei tawh. MPL bik atan chuan pakhat dang chu kan lak belh maithei a, nikuma kan defender Emma leh forward Justice te chu MPL bikah chuan kan hmu tawh lo ang. I League min thlenpuitu kan player-te an pawimawhna kan hria a, contract thar kan pe vek a, an khelh zel duh leh duh loh chu player duhthlanna a ni," tiin a sawi.

Aizawl FC hian nikum khan MPL match 14-ah point 35 an hmu a, double legged final-ah Chanmari FC an hneh.