Messi dan aiin thlalak pui an duh zawk - Godin

Atletico Madrid leh Uruguay defender Diego Godin chuan Lionel Messi chu La Liga-ah an ngaisang lutuk a, dan tum aiin thlalak pui an duh zawk ang hialin a sawi.

Argentina captain Lionel Messi-a'n Copa America khelh zawh takah goal khat chiah a khung a, a goal khung chhun pawh penalty aṭanga a khung a ni.

Copa America-a Messi chetṭhat tawk loh chungchang sawiin Godin chuan, "South America chu a dang a ni. Spain ang lo takin nasa zawkin Messi hi an ven rawn. Ka ṭhiante nen fiamthuin kan sawi a, Spain-ah chuan inkhelh hmain thla an lak pui a, chutah chuan an lungawi tawk. Fiamthu mah nise thudik a ni," tiin a sawi.

Godin chuan sawi chhunzawmin, "Messi hi Argentina tana a khelh chuan tlemin a tawlh hnung hret a, goal khung turin khingpui tawn tlang tur a ngah bik. Chubakah South America-a khelmual hi a dang hret a, hengte vang hian Barcelona tana Messi goal khung zat leh ram tana a goal khung zat hi a inang thei lo," tiin ram tana Messi chet ṭhat loh chhan a sawi.