Hloh hlepa chhiartu Schneiderlin
Manchester United player thar Morgan Schneiderlin chuan Southampton-a a khelh laia League One a an tla thla chu chhiatpui aiin a ṭhat pui zawk thu a sawi.
Schneiderlin-a'n Saints a kum sarih hun a hman chhungin kum 2009-10 season leh 2010-11 season khan Saints hian League One an khel a, hemi hnu hian Championship-ah kum khat khel lehin 2012–13 season khan Premier League-ah an rawn inhlangkai a ni.
Kum 25-a upa midfielder hian tun nupui transfer-ah pound maktaduai 25-in Manchester United a zawm a, kum hnih champion nomawi engmah chawi loa awm tawh Red Devils chu champion nomawi chawi pui a tum dawn a ni.
French international chuan, "Kum 2009-a League One kan khelh kha ka ngaihtuah let hian ka tan chuan hlawkna a ni zawk. Division hniama kan tlak kha thawkrim tura min fuihtu a ni a; tun hun ka thlen theihna chhan pawh hi a ni," a ti.
Season thar thlirlawkin Schneiderlin chuan, "United ang club ropui tan chuan 'big four' a awm hi a inhmeh a; awm tur pawh kan ni. Kan inkhelh apiangah chak kan duh dawna, a pawimawh ber chu champion a ni ang," tiin a sawi bawk.