HPC Cup A vawi hnih nan Electric Veng an champion

Electric Veng-in HPC Cup vawi ngana final-ah Zotlang an hneh a, HPC Cup history-a champion zawn hmasa ber an ni.

June 16 aṭanga khelh ṭan team 50 telna HPC Cup 2015 chu nimin chawhnu khan Ṭhuamluaia Mual, Lungleiah khelh zawh a ni ta. Final-ah Electric Veng chuan Zotlang 3-2 a hnehin a vawi hnih nan an champion a, cheng nuai khat an dawng.

HPC Cup hi Village Council huamchhung inelna ni mah se ṭum li khelh tawhah veng/khaw pawn player lak phal a ni. Tun ṭumah hian veng/khaw chhung player chauh hman tur a nih avangin inelna boruak a nung phah hle.

Final-ah minute 24-naa Lalnunfela Renthlei goal khung hmangin Zotlangin hma an hruai a, he goal khat hi an chakpui tlang mai dawna a lan laiin minute 82-naah champion lai Electric Veng tan K Lalchhanhima'n (Tetepuia) goal a khung, 1-1 a ni.

Electric Veng fans an lawm rei lo, goal hmahruai khungtu Nunfela'n minute hnih hnuah Zotlang goal hnihna a khung. Hun tawp hma chiahin Tetepuia'n goal hnihna a khung ve leh a, minute 90 chhungin 2-2 in an inhnehtawk.

Extra time-ah Electric Veng tan Lalhlimpuia-a'n chakna goal a khung a, Lalhlima goal hmangin Electric Veng 3-2 in an chak. FC Kulikawn leh Reitlang FC defender hlui Lalhlima hi Best Player a thlan a ni nghe nghe.

Final-a Electric tana goal hnih khungtu Tetepuia hian HPC Cup vawi nganaah goal 12 khungin top scorer a ni a, Chanmari FC player hi 2015 ZoFooty Young Player of the Year Nominee-a telh a ni.

HPC Cup History
Kum Champion Runners Up
2011 Hnahthial Cherhlun
2012 College Veng Theiriat
2013 Lunglawn College Veng
2014 Electric Veng Ramthar
2015 Electric Veng Zotlang