Ronaldo-a'n goal a khung zel

Cristiano Ronaldo hming leh goal sawizawm a ngai reng mai. Juventus forward hian goal khung a bansan thei lo; Nilaini zan Coppa Italia quarterfinal inkhelah Ronaldo hian goal khungin AS Roma lakah 3-1 in hnehna a chanpui.

Italian champion hian semifinal-ah chuan AC Milan leh Torino inkhela chak zawk an hmachhawn leh ang, champion lai Lazio chu an elpui Napoli hneh loin Thawhlehni zan khan an tla tawh.

Allianz Stadium-a inkhelah Ronaldo a langsar, minute 26-naah Gonzalo Higuain-a cross chu a khung a, chawlhlawk hmain Rodrigo Bentancur leh Leonardo Bonucci ten an khung belh bawk.

Second half-ah Roma winger Cengiz Under-a goal shot chuan bar a per a, ball per hi goalkeeper Gianluigi Buffon chuan anmahni lamah a ti lut palh. Goal dang lut tawh loin Turin club an chak tlang, nikuma an champion lohnaah champion an tum.

Kum 34 mi a ni tawh a, a kum tam deuh tawh mah se Ronaldo ke a la hmui reng - season kal laiah ram leh club tan match 31 a khelh aṭangin goal 30 zet a khung, tun hnaiah Juve tan a match hnuhnung 10 aṭangin goal 13 a khung tling a ni.

Juventus manager Maurizio Sarri-a'n an match hnuhnunga Parma hnehtu aṭangin player paruk ngawt a siksawi a, winger Douglas Costa leh defender Daniele Rugani ten bul an ṭan. Mattia De Sciglio, Giorgio Chiellini, Samu Khedira leh Merih Demiral te chu hliam vanga chhawr theih an ni lo.

Inelna an hmachhawn hnem a, player an inkhelh chhawk a ngai nasa. Hetiang boruak karah hian mamawh huna goal khung thei Ronaldo an nei hi an vannei. Sarri chuan, "Ronaldo hi a ṭhat vanglai a la ni, goal khung tura a tlan chakzia leh chet ranna kha a ropui.

"Player awm tawhah chuan a ṭha berte zinga mi a ni, keini lam pawhin a vawi ruk nana Ballon d’Or a dawn theih nan kan puih a pawimawh ang," a ti. Italian manager hian club bakah mimal chawimawina dawn a pawimawh thu a sawi.