Champhaiah Saron par a vul dawn em?

Sharda University Mizoram Super League X chu nizan khan Champhaiah khelh ṭan a ni a, match hmasa berah khawtual team Champhai Basketball Club leh Khatla TBL an inkhel a, result erawh kan hre hman lo.

Zan khatah match khat chauh zel khelh a ni dawn a, March 21, Zirtawpni zan thleng inkhel en tur a awm dawn tihna a ni - zanin dar 7:00 hian beisei aia MSL ngam Saron Veng Basketball Club leh Chanmari Basketball Club an inkhel ang.

Chanmari hian MSL-ah a tikimtu mai nih an tum lo tih pholangin, match hnih an khelh tawhah an chak ve ve a, an khel a hmuhnawm ṭhin hle - kai thar, phur vanglai tawng mek Saron BC nena an inkhel tur hi en châkawm a tling.

Saron hian match hnih khelh tawhah vawi khat hnehna changin, vawi khat an tlawm - an match hmasa berah Electric Basketball Club chu 80-72 in an hneh a, kai thar ni mah se, MSL-a an season hmasa berah sulhnu ropui hnutchhiah nghal an duh.

Mahse, Saron BC hian an match hnihnaah Zarkawt BCA an ngam lo. MSL vawi nga champion tawh lakah hian quarter khatna an la nghal hial a, mahse, Zarkawt an 'comeback'.

Saron tan an inrintawkna nei let turin Chanmari laka chak a pawimawh a, tun MSL-a club ṭha ber pawl hi Champhai khawpuiah an hneh thei a nih chuan an phur lehzual sawt ang - chumi tur chuan player chhuanvawr T. Lalhriatzela'n a theihna a pholan a ṭul a, India international Abhisek Tyagi pawhin mawhphurhna a lak a ṭul.

Mipui mit fukna ber tur erawh Frederick Elombi a ni lo thei lo ang. Cameroon mi, 6ft 7in-a sang Elombi hi chakpui tham khawpa thiam bik a ni a, a palenna ringawt pawh hi Saron tan chhawr tham tur a ni.

Hetihlai hian Saron tan Chanmari hi an lian hret mai thei - football leh cricket thlenga Mizoram top flight inelnaa club nei thei veng hian basketball-ah pawh hming chher tumin hma an la a, an match hmasa berah Zarkawt BCA chu 77-75 in an hneh nghal.

Hei mai a ni lo - Chanmari hian an match hnihnaah Electric Veng êng chhit tum chu timitin, Electric BC chu 80-71 in an hneh zui a, match hnih an khelh tawhah an chak ve ve.

US tlangval Gregoryshon Magee-a'n BCA lakah point 24 score-in, Electric lakah pawh point 24 tho a nei. Saron-in chak an duh chuan ani hi dah ṭhat dan an ngaihtuah a ṭul a, mahse, Chanmari hian Lalnungsanga leh tawnhriat nei ṭha Moses Zoremmawia te ho an la kawl a, Uttar Pradesh tlangval Pulkit Sachdeva a la awm cheu bawk.