Djokovic leh Alcaraz inhmachhawn thei dawn

Tennis inelna ngaihhlut hlawh zinga mi Miami Masters 2025 chu qualifying khelh mek a ni a, inelna tak chu Zirtawpni zing aṭanga khelh ṭan a ni ang. Player inhmachhawn thei zingah Novak Djokovic leh Carlos Alcaraz te an awm dawn.

Tournament an khelh dan tur pawh fel a ni tawh a, an chak tluang zel a nih chuan Djokovic leh Alcaraz te hi semifinal-ah an intawng thei dawn a, season hmasa Wimbledon finalist te hi inhmachhawn thei ngei se tih chu tennis ngaina tute duhthusam a ni.

Nikum khan Djokovic hian Paris Olympic gold medal a vaw chhuak, medal lian tham dang lak a nei lem lo. Kuminah pawh beisei angin a la hlawhtling mai lo a, atan insiamṭhat theihna hun remchang a ni ang.

Hremna a la hman zawh loh avangin Jannik Sinner chu a la inlan thei dawn lo a, Italian tlangval hi damdawi hman phal loh a hmang tih an hriat chhuah avanga hrem mek a ni - French Open khelh dawnah a inkhel thei leh chauh dawn a ni.

Sinner a inlan theih loh karah hian ranking lama a elpui Alexander Zverev leh Alcaraz te chuan hun ṭha an nei thung tihna a ni a, an chunga awm Sinner an phak lohna sawr zim theihna remchang a ni thung ang.

Indian Wells champion Jack Draper pawh a inlan dawn - British tlangval hi world ranking thar berah chuan pasarihna a ni tawh, tournament a khelh tawh te nen chuan boruak a inang dawn lo, mipui mit fukna a ni tawh dawn a ni.