Mahuma Memorial : Ṭhuampui tan chak ngei a pawimawh

Cricket Association of Mizoram (CAM) hnuaia team ṭha inelna - Mahuma Memorial 1st Division Screening Tournament chu a hmawr bawk a hnai, vawiin chawhma dar 9:00 hian Chanmarians leh Ṭhuampui Chinari te an inkhel ang.

Team pariat inel zingah a hniam pahnih an tla dawn a, table mawngphah luahtu Ainawn Veng Pacers chu an tla chiang tawh - an chunga awm Ṭhuampui tan inhamtang turin chak ngei ngei a ngai thung a ni.

Ṭhuampui tan chak ringawt a tawk lo. Ninganiah Luangmual leh Zemabawk ten league round hnuhnung ber an khel dawn a, Zemabawk hi an chak a nih chuan an him dawn, chuvangin Ṭhuampui hian midang inkhel result an ngaihchan tel a ngai bawk tihna a ni.

Table chungsanga awm Kulikawn leh Ramhlun Venglai te chuan final an khel dawn tih a chiang tawh, team pahnih te hi nimin khan Suaka Cricket Stadium, Sihhmuiah an inhmawchhawn a, ruah sur vangin an inkhel zo thei lo a, inhnehtawka puan an ni.

Ṭhum vawra vannei zawk Kulikawn lamin vuak hmasak an thlang a, over 48.2 chhunga run 160 siamin an out kim. RVL lam vuak hun a thleng a, over ruk chhungin run riat bak an siam hman lo, ruah sur vangin an khel chhunzawm thei lo.

A sang pahnite an inhnehtawk takah chuan, match sarih aṭanga point 13 hmuin Kulikawn chu a sang berah an awm tlang, hneh loh an tawng lo. Point 11 neitu Ramhlun Venglai chu pahnihnaah an awm ta bawk a ni.

Mahuma Memorial 1st Division Screening Tournament-ah hian team pariat an tel a, vawi khat ṭheuh an inkhel kual chhuak - a sang pali te chu Mizoram Cricket League khel turin an tling nghal dawn, MCL hmun ruak pahnih chu auction hmanga hnawhkhah leh tur a ni ang.