Warriors chak tluang a tawp

NBA regular season kal laiah Golden State Warriors chuan nimin zing khan Denver Nuggets chu 105-114 in an hneh lo, a zawna vawi sarih hnehna an chan hnuah an chak tluang lai chu a tawp ta a ni.

San Francisco-a inkhelah Nuggets tan hian Aaron Gordon chuan point 38 a nei a, tun season kal laia point a neih tam ber ṭum a ni. Gordon hian kum 2021 khan Orlando Magic aṭangin Nuggets hi a zawm a, a hnu lamah match khata point a neih tam ber ṭum a tawng.

Russell Westbrook-a'n NBA huanga triple-double nei tam ber a nihna a sawhnghet zel bawk a, nimin zing inkhelah hian 2 point, 11 rebound leh 16 assist a nei a, triple-double hi vawi 203 teh meuh a nei tling ta a ni.

Golden State coach Steve Kerr chuan, "A tir aṭanga a tawp thleng khan kan khelh dan phung pangngai kan phak lo reng reng, tun ṭumah chuan chak phu zawka khelin hnehna an chang," tiin an khingpui Nuggets a dahsang thiam hle.

Western Conference table-ah Denver Nuggets hi palina an ni chhunzawm a, chak lo Golden State Warriors erawh parukna an ni. Stephen Curry leh a ṭhiante hi playoff khel phak chinah chuan an awm tho a, mahse an hna a hautak chho ang.

Nimin zing inkhel dangah Los Angeles Lakers chuan LeBron James an la chhawr thei lo a, an thiampuipa tel lo hian San Antonio Spurs chu 125-109 in an hneh a, an chunga awm Nuggets an um ve zel bawk a ni.

Point 25 ngawta an hnufual hnuah Houston Rockets chuan Philadelphia 76ers 144-137 in an hneh, overtime an khelh hnuah an chungnung zawk. Minnesota Timberwolves pawhin hnehna chang turin overtime khelh an mamawh, an khingpui Indiana Pacers chu 132-130 in an hneh ve bawk.