Swiatek a inbunruak

Tun hnaiah Iga Swiatek a khel ṭha tawk lo a, tennis court leh a chehvela a chet dan chu tun hma lam nen a inang lo bawk - sawiselna hrang hrang a tawh mek karah hun harsa a paltlang tih a sawi.

Season hmasa tawp lamah khan Swiatek hi thla khat aia rei a inkhel lo. Asia rama inelna a hmachhawn tur ho aṭang pawhin a inhnukdawk a, a inkhelh loh chhan hi hremna a tawh vang a ni tih a hnuah hriatchhuah leh hnuhnawh a ni.

Indian Wells khelh zawh takah pawh khan a thinrim insum thei lo in ball a vaw vak a, hei hian ball boy a fuh teuh hle - social media lamah sawisel a hlawh zui bawk.

Polish nula Swiatek chuan, "Khelmual chhung leh pawn lama ka nungchang lo chik ṭhin ten min sawisel tih ka hria, a nihna takah chuan tun hma lama ka boruak zangkhai leh nuam tak ang kha ka la tawn leh thei lo.

"Hriat loh vangin damdawi hman phal loh chungchangah hrem ka ni a, hremna ka tawh chhung khan nitin hian ka ṭap ṭhin, chu chuan ka nunah nghawng na tak pawh a nei, thu in ka sawifiah thiam mai lo a ni.

"Ka rilru tawtna leh hrehawm tihna te chu inkhelh danah a lang chhuak tih ka lo hria, hei hi a pawi ka ti takzet," tiin a sawi a, insiamṭha turin hun a la mamawh dawn tih a sawi tel bawk.

Swiatek hian kum 2022, 2023 leh 2024 hun tam zawk khan world number 1 ni chungin hun a hmang, nikum October thla khan Aryana Sabalenka chuan a dinhmun hi a rawn nek chhuak a ni.

Kum 23 mi chauh la ni mah se Swiatek hian Grand Slam nomawi panga ngawt a vaw chhuak tawh a, hmabak thui tak a la nei bawk, hun harsa a tawhna aṭangin a la tal chhuak leh ngei pawhin a rinawm.