Europe-a player tha ber kan hre hnai ta

UEFA chuan kum danga a lo tih ṭhin tawh angin Europe-a player ṭha ber a thlang leh dawn a, 2014/15 season puala Best Player in Europe Award dawng thei tur hming 35 a chhawpchhuah aṭangin player 10 a thlangchhuak leh ta.

Heng player 10 aṭang hian award dawng thei tur hming pathum chhawpchhuah leh a ni anga; mi pathum hming hi August 12-ah puangchhuakin award semna hi August 28-ah neih tur a ni ang.

Award dawng thei tur hming 10 an chhawpchhuah te hi UEFA hnuaia ram hrang hrang 54-a an journalist ten an thlanchhuah a ni a, mi 35 zinga hming chhawpchhuah 10 hi vote hmu sang zual te an ni.

Europe football-a award ngaihhlut hlawh tak hi Lionel Messi (2011), Andres Iniesta (2012), Franck Ribery (2013) leh Cristiano Ronaldo (2014) ten an lo dawng tawh.

Khawvela league ngaihven hlawh leh sang ber anga ngaih English Premier League-in player 10 zingah pakhat chiah an thawh ve a, EPL player lang awmchhun hi PFA Player of the Year lawmman dawngtu Chelsea winger Eden Hazard a ni.

Treble champion Barcelona-in an player pathum ngawt an thawh a, season hman zawh taka goal 122 khungtu Barca attacking trio Lionel Messi, Neymar leh Luis Suarez te chu he award dawng thei tura rinkai zinga mi an ni nghe nghe.

Season ṭha tak hmang zo hlim Juventus-in player an thawh­hnem a, Champions League final-a Barcelona an hneh loh vangin Turin khaw club hi treble champion ni ta lo mah se Europe Best Player lawmman dawng thei tur hian an player pangnga ngawt an thawh. Juve player te hi goalkeeper Gianluigi Buffon, midfielder Paul Pogba, Arturo Vidal leh New York City FC pan ta Andrea Pirlo bakah Boca Juniors lama kir Carlos Tevez te an ni.

Real Madrid-in eng nomawi mah chawi loin an season hmang liam mah se Portuguese player ropui Ronaldo erawh a lansarh ngaiin a langsar reng a, Europe Best Player lawmman dawng thei tura Real player lang awmchhun a ni.

Heti hian Europe Best player lawmman dawng thei tur hming sawm chhawpchhuah zinga pariat lai hi Champions League finalist team ami an ni.