Raheem Sterling: Man City mamawh chhanna a ni thei ang em?

Nipui transfer a inhawn ruala sawi hlawh ber chu Raheem Sterling a ni. English winger hian Liverpool-in kar khata £100,000 hlawh tura contract thar an zawrh a hnawl a, sum aia nomawi chawi a dah pawimawh zawk thu a sawi.

Sterling-a ṭawngkam hi Liverpool in haw duh ngat se chuan huat awm tak a ni; English football chanchina club ropui ber pawl hi nomawi chawi thei tur hmuhin Sterling hian a hmu lo tihna a ni a, amah duhtu zingah Manchester City an langsar nghal bawk.

Sum tam tak nen City

Arab sum ring City hi pawi­sa­ah an buai lo a, nipui transfer-a an player lakluh hmasa ber ni turin Sterling an hel nghal. A vawi khat nan pound maktaduai 25 nen Anfield an dawr phawt a, hnar an ni. A vawi hnih nan pound maktaduai 35.5 nen Liverpool an dawr leh a, an vawi hnih dawrna hi a ṭul dan a zira pound maktaduai 40 thlenga kaisang thei tur a ni.

Mahse, Liverpool-in an winger manah hian pound maktaduai 50 an chhiar tlat a, tlawm taka hralh ai chuan Liverpool-a kum hnih contract a la neih lai hman zawh tir pawh an thlang zawk. A vawi thum nan Manchester City-in pound maktaduai 49-in Liverpool an dawr leh a, Reds an ṭang zo tawh lo.

Liverpool defender chawl ta Jamie Carragher chuan Reds-in Sterling an hralhna zat chu sumdawnna ṭha tak a nih thu a sawi a, City aiin Liverpool tan a hlawkthlak zawkah a ngai.

Sterling = bench?

Manchester City-in tlar hmaah Sergio Aguero, Wilfried Bony, Edin Dzeko, Samir Nasri, Jesus Navas leh David Silva te an nei a, heng ho zinga hmun chang phak tura beih hi a hautak dawn.

City-ah Joe Hart tih loh English player hlawhtling tak an la vang hle. English player an neih zingah James Milner, Micah Richards, Jack Rodwell leh Scott Sinclair te chuan an khelh phakna tur zawngin City an chhuahsan vek.

Sterling-a dinhmun ti ṭhatu erawh a kum a ni. A elpui ber tura ngaih Silva leh leh Navas te hi kum 29-a upa an ni tawh a, Nasri hi kum 28 a ni thung. Kum 20-a upa English winger hi tha za rual lek a nih avangin kum upa tawh winger dang ai hian a regular daih thei.

Liverpool left-back ṭhin Ste­phen Warnock chuan, "Sterling hian a theihna pholan hi a chak zek zek ang. Liverpool-a Suarez nen an khelhdun lai khan Sterling ṭhat lai ber kan hmu a, City-ah Aguero te ho nen an inkawp dawn a, Liverpool-a a

ṭhat ber lai ang kha a phochhuak thei dawn a ni," a ti.

Hetihlai hian Manchester City captain hlui Rodney Marsh chuan Sterling chuan a hun tam zawk bench-ah a hman a rin thu a sawi thung.

A to uchuak em?

Liverpool legend Carragher chuan, "Raheem-a man chung­changah hi chuan inhnialna tam tak a awm thei. British mi a nihna leh hmabak eng tak a neihna hi a man ti to tu ber a ni a, tuna a thiamna ringawt aṭang chuan a man zat hi a to mai thei," a ti.

City tana vawi 118 lai lo khel tawh Marsh chuan, "Sterling hian pound maktaduai 49 hi a phu a nih chuan Aguero hi chu Sterling-a man let li pound maktaduai 200 hu a ni. City hi chuan an duhzawng neih mai zel hi an duh a, khawvela rawlthar player ṭha ber pawl neih an duh avangin heti zat hi an inseng a ni," tiin Sterling-a man chu to mah mah nia a hriat thu a sawi.

Enkawl hautak Sterling

Liverpool-in contract thar an zawrh a ziah duh loh hnuah Sterling-a'n huaikawmbawl a chhunzawm a, Liverpool-in contract thar nena dawr an tum mek laiin na takin a agent phei chu a ṭawngchhuak hial.

Sterling-a agent Aidy Ward chuan, "Liverpool hian kar khata £700,000, £800,000, £900,000 thlenga hlawh tur pawn contract zawrh mah se Sterling hi Anfield-ah a cham chhunzawm chuang lo ang," a ti a, he thu an hriat rual hian Liverpool pawn Sterling biak an tumna an ṭhulhsan nghal.

Pre -season tour-ah tel loh a dil a, ni hnih lai damloh chhuanlamin training a zawm lo a, player nunchang ṭha tia sawi tur a ni lo.

Sterling a ṭha tawk em?

Tun hnaia Soccerex in a zirchiannaah chuan Europe a rawlthar player zingah Sterling aia hlu zawk an awm lo a, PSG defender Marquinhos leh Manchester United Memphis Depay te aia hlu zawk anga ngaih a ni.

Football a chawlhsan hnua football pundit ni ta Carragher chuan, "Raheem hi rawlthar ṭha tak a ni tih hi phat rual a ni lo. Mahse, a kum ang zata Owen, Rooney, Fowler leh Giggs te ropuina ang kha tunah hian a la pha lo hle a, pound maktaduai 49 a hralh hi Liverpool tan chuan hlawkna a ni," a ti.