Davis Cup atan Murray a inpeih
Zanin aṭanga Queen's Club-a khelh ṭan tur Davis Cup quarter-final atan Britain number 1 Andy Murray chuan a inpeih thu a sawi.
Kum 1981 hnuah Britain hian World Group semi-final an la thleng leh ngai lo, he an record duhawm lo tak thai bo tur hian France team an hneh a ngai dawn.
Kum 28-a upa Murray hi kar hmasa a khelh zawh tak Wimbledon semifinal-ah Roger Federer hneh loin a tla a; inkhel chau hle mah se kar khat pawh a liam hmain an ram tan a inlan leh nghal a ngai dawn a ni.
World number 3 Murray chuan, "Tun hnaiah kan team kan chet ṭhat avangin kan khingpui tur France hi team ṭha tak ni mah se kan zam lo. Anni hneh thei tur hian kan inpeih tawh hle, grass a inkhel tur kan nih dawn avangin a hautak leh dawn a, mahse kan buai ka ring lo," tiin a sawi.
May thla khan Britain team hian quarterfinal thleng turin US chu 3-2 in an lo hneh tawh. Mahse semifinal thleng tur chuan an hmabak hi a hautak dawn hle.
Captain Leon Smith a kaihhruaina hnuaiah Murray leh James Ward te hi single a an innghahna tur an ni anga, anni bakah hian Wimbledon double finalist Jamie Murray leh Dom Inglot te chu an innghahna tur an ni ang.
Britain khingpui tur France team-ah hian player langsar tak tak World number 11 Gilles Simon, number 12 Jo-Wilfried Tsonga leh number 13 Richard Gasquet te chu single-ah an inlan dawn bakah thla hmasa lawka Queen's Club champion Nicolas Mahut leh Pierre-Hugues Herbert te chu double-ah an inlan dawn bawk a ni.