Bangladesh-in South Africa an barakhaih

ODI series-a Bangladesh-in India an hneh hnuin South Africa an hneh leh a, khawvel an barakhaih.

Khawvela cricket khel thiam ram zinga chhiar tel ni ngai lo Bangladesh tan an ram chhunga a zawna vawi li ODI series an lakna a ni a, South Africa hma hian India leh Pakistan lakah series an lo la tawh bawk a ni.

Bangladesh leh South Africa te hi ODI match vawi thum khel tura tih an ni a, vawi hnih inkhel tawhin vawi khat ve ve an chak. Nilaini khan match thumna khelh a ni a, a chak zawk zawkin series an la dawn.

Bat hmasa zawkah mikhual team South Africa an ṭang a, ruah surin inkhel a tihbuai avangin over 50 khelh turah over 40 khelh a ni. South Africa-in over 40-ah run 168 an vawchhuak thei hram a, mi pakua an hloh.

South Africa tan ball 70 a hmachhawna run 50 vawchhuaktu JP Duminy leh ball 51-a run 44 vawchhuaktu David Miller te khel pangngai viau mah se batsman dangin an thlawp ṭha tawk lo a, Bangladesh tan target umphak a huphurhawm lo.

Bangladesh bat hun a thleng a, hmuhnawm khawpin opener pahnih Tamim Iqbal leh Soumya Sarkar te an bat. Kum 26-a upa Iqbal hian ball 77 a hmachhawnah run 61 a vawchhuak a, a tawp thleng a dam. Kum 22 leka upa Soumya Sarkar a che ropui bawk a, nikum December thlaa a ODI match hmasa ber khel ve chauhtu batsman hian ball 75 a hmachhawnah run 90 a vawchhuak.

Beisei loh zawk Bangladesh-in wicket kuain hnehna an chang a, 2-1 in series an la.