Celtic-in kawng dik an zawh

Nilaini zan khan Celtic leh St­jarnan chu Glasgow-ah UEFA Champions League se­cond quali­fying first leg-ah inhma­chhawnin Celtic hian sihnih faiin hnehna an chang. Karlehah second leg khelh leh nghal a ni ang.

Celtic hian goal khungna hun ṭha vawi thum an bawhpelh hnuah defender Dedryck Boyata chuan minute 44-ah an hmahruaina goal ni turin corner aṭanga ball lo kal chu a tauh goal. Second half-ah Stefan Johansen chuan goal khat dang khung belhin Celtic an chak chiang.

He inkhelah hian minute 77-naah Brynjar Gudjonsson-a foul vangin Celtic-in penalty an hmu; he penalty hi Stefan Johansen leh Leigh Griffiths te chuan pet an inchuh. Goal khat lo khung tawhtu Johansen-a'n petin Stjarnan goalkeeper chuan a lo dan sak.

A player ten penalty pet an inchuh chu pawi a tih thu sawiin Celtic manager Ronny Deila chuan, "Khatiang thil a thleng kha a pawi ka ti takzet. A puitlin loh thlak hlein ka hria. Penalty kha chu Griffiths-a pet zawk tur a ni," tiin a sawi.

Champions League group stage thleng turin Celtic hian third qualifying an paltlang thei a nih chuan playoff an khel leh anga, chuta an la chak a nih chuan group stage an thleng ang.

Playoff khel tur hian Premier League club Manchester United, Valencia, Lazio, Sporting CP, Bayern Leverkusen te an tling tawh.