Van Gaal-a thu zawm lo Valdes Transfer tingaihnawmtu United goalkeeper

US Tour-ah Manchester United-in veteran keeper Victor Valdes an hruai tel lo a, Real Madrid zawm tura sawi David de Gea a tel lawi si. Season thar atana United keeper buaina a inṭan dawn chauh.

Louis van Gaal chuan Valdes an hruai tel loh chhan a sawi chiang a, nikuma reserve team tana khel duh lo Spanish keeper chu hralh chhuah a tum.

Valdes Out

Manchester United manager Louis van Gaal hi pa thu duh tak a ni a, ngaihdan thlak mai mai chi a ni lo.

Kum 63-a upa Van Gaal chuan, "Valdes hian kalphung a zawm loh avangin kan hruai tel lo. Nikum khan second team-ah khelh a duh lo a, ka thu a zawm loh chuan atan kawng khat chauh a awm, chu chu club aṭanga chhuah a ni," tiin Spanish veteran keeper chu club dang pan turin a hrilh.

Kum 33-a upa Valdes erawhin buaina awm lo ang maiin twitter-ah, "Tukin zing chu rim takin training ka nei a, season thar atan ka thawkrim hle. Reds ṭang zel ang aw," tiin a ziak.

Barcelona keeper hlui Valdes hi nikum khan United under 21-ah Liverpool, Chelsea leh Spurs nena an inkhelh ṭumin a inlan a, Premier League match hnuhnung bera Hull nen an inkhelh ṭumin starting eleven a chang bawk.

Keeper buaina chu

Manchester United-in De Gea chu keeper manto ber a nih dawn loh chuan chhuah tir an tum lo. Real-in United keeper hi an la lut duh a nih chuan Juventus-in kum 2001-a Parma aṭanga Gianluigi Buffon an lakna man pound maktaduai 32.6 chuang hreta an lakluh a ngai ang.

Spanish keeper hian contract a ziah belh duh loh chuan 2016-ah free transfer-in a lak chhuah theih dawn a, hei vang hian Real-in pawisa sen tam an duh bik lo.

Chutihrualin United-in Real defender Sergio Ramos chhuahtir an phal chuan an keeper hi pek an pawi ti lo. Amaherawhchu Spanish club hian United-in pound maktaduai 28.6-a Ramos lei an tumna an hnawl a, manager thar Rafael Benitez-a'n pre season tour an neih chhoh turah Spanish defender hi captain atan a ruat.

United-in De Gea hi contract thar ziahpui an tum a, kar khata £175,000 hlawh turin an dawr a, hei hi tuna a hlawh let hnih aiin a tam zawk. Chutichung chuan De Gea hian a bialnu Edurne Garcia te khaw club Real Madrid tana khelh hi a la thlang zawk ang.

Real nge buai United

Real Madrid hian hun rei tak captain atana an hman Iker Casillas chu FC Porto lamah an chhuah. Australia-ah keeper pathum Ruben Yanez, Pacheco leh Keylor Navas an hruai. Kum 21-a upa Ruben hian first team tan a la khel lo a, amah aia kum hniha upa Pacheco hian Cup inelnaah vawi khat chiah a la khel. Costa Rica keeper Navas chiah hi senior keeper-a chhal theih a ni.

United-in US tour-ah first choice David de Gea bakah Anders Lindegaard leh Sam Johnstone te an hruai a; Lindegaard leh Johnstone hi nikum khan United tan vawi khatmah an inlan lo.

Danish keeper Lindegaard hian kum khat chiah contract a nei tawh a, kum 22-a upa Johnstone hi a ṭhat tawk loh avangin nikuma loan-a a kalna Preston North End-ah a chhuah leh rin a ni.

Engtin zel?

United executive vice-chairman Ed Woodward-a'n transfer-ah tawnhriat a nei ṭan a, awlsam taka palzut theih a ni lo tih a lantir chho mek.

Van Gaal leh Ed Woodward te hi an luhlul tlat chuan De Gea kum khat chhawr leh a, man nei loa chhuah tir an duh ang.

Valdes erawh Turkish club aṭangin duhtu a nei a, Robin van Persie leh Nani te hnungzuiin a chhuah mai a rinawm.

United nena sawi zawm Hugo Lloris chu a banrek a tih nat avangin season ṭan tirhah Tottenham Hotspurs tan a inlan thei dawn lo a, veteran keeper Petr Cech-a'n Chelsea chhuahsanin Arsenal a zawm tawh a, Chelsea-in Cech thlak nan Stoke City keeper Asmir Begovic an la lut tawh bawk.

Hetihlai hian kum 28-a upa Argentina keeper Sergio Romero-a'n thla hmasa khan Sampdoria a chhuahsan a, club a nei lo. United hi Netherlands keeper Jasper Cillessen nen sawi zawm an ni bawk.

United hian Romero emaw Cillessen emaw pawh hi la lut se, Valdes-a dinhmun thlir chuan first keeper tur ni loin De Gea thachangdawltu tur an ni thei bawk.

Engnge an sawi tawh?

Van Gaal chuan nikum season tawp lam khan, "United hi club lian tak kan nih avangin awlsam tak chuan min chhuahsan lo ang," tiin a lo sawi tawh.

Hemi zawh kar hian Dutch manager chuan, "David de Gea hi kan bula a awm ka la ring a ni," tiin a sawi leh bawk.

United manager-in thuchiang a sawi duh lo a, a ṭawng tam pauh leh rin thiam a har tual tual. September 1-a transfer tawp hunah engkim a chiang ang.