Rivaldo leh a fapa in goal an khung

World Cup champion pawh lo ni tawh Brazilian Rivaldo leh a fapa Rivaldinho te chuan Brazilian second division match-a Mogi Mirim leh Macae inkhelh ṭumin goal an khung ve ve a; Mirim hi 3-1 in an chak.

Barcelona leh AC Milan forward hlui kum 43-a upa Rivaldo hian kum 2014 khan inkhelh a lo chawlhsan tawh a; mahse tun thla khan rawn kir lehin Nilaini zan khan Mogi Mirim tan an pafain an inlan a ni.

He inkhelah hian kum 20-a upa Rivaldinho-a'n a tauh goal bakah Rivaldo hian penalty aṭangin goal a khung a ni.

Pafa inkhel thiam team khat tana inkhel hi an lo awm nual tawh a, mahse match khata goal khung dun tak hi chu an awm ngai meuh lo thung. Pafaa inkhel thiam zingah English football, European Cup winner Ian Bowyer leh a fapa Gary te chu Hereford United tan an lo khel dun tawh. Manchester City forward hlui Alec Herd leh a fapa David te chu Stockport County tan kum 1950 daih tawh khan an lo khel dun tawh bawk.

Kum 1996 khan Iceland leh Estonia inkhelh ṭumin rawlthar kum 17-a upa Eidur Gudjohnsen chu substitute aṭangin a inlan tawh a, hemi ṭhum hian Gudjohnsen-a pa kum 34-a upa Arnor chu a inkhel ve bawk. Mahse an pafain khelmualah an lut rual lo thung.